අනුමත කළ සිරින්ජර ටෙන්ඩරයකට අදාල සිරින්ජර තත්වයෙන් බාල වීම් හේතුවෙන් වෛද්ය සැපයුම් අංශය සැපයුම් අත්හිටුවීම නිසා රට පුරා රජයේ රෝහල්වල සිරින්ජර හිඟයක් ඇතිවී තිබෙන බව සෞඛ්ය සේවකයින් පවසනවා.
සෞඛ්ය සේවකයන් පවසන්නේ ඇතැම් සිරින්ජර තුළ ජල වාෂ්ප සහ විවිධ තෙල් වර්ගවලින් අපිරිසිදු වී තිබීම පිළිබඳව පැමිණිලි ලැබීම හේතුවෙන් සැපයුම් අත්හිටුවා ඇති බැවින් මිලිලීටර 10 සහ මිලිලීටර 20 සිරින්ජරද තොග වෛද්ය සැපයීම් අංශයේ නොමැති බවයිි.
මිලිලීටර 5 ප්රමාණයේ සිරින්ජර පමණක් කුඩා ප්රමාණයේ තොගයක් රෝහල් තුළ ඇති බවත් මිලිලීටර 20 සහ මිලිලීටර 10 සිරින්ජර අවශ්යතාවයන් සඳහා කුඩා සිරින්ජර වැඩි වශයෙන් භාවිතා කිරීම හේතුවෙන් එම සිරින්ජර තොගය ද ඉදිරි මාසයේදි අවසන් වන බවත් ඔවුන් පවසනවා.
බොහෝ ඖෂධ රෝගීන්ට දීම සඳහා සහ රුධිර පරීක්ෂණ ඇතුලු සේවාවන් රැසක් සඳහා මෙම සිරින්ජර අත්යවශ්ය බැවින්, ඖෂධ තිබියදී පවා ඒවා රෝගීන්ට දීමට නොහැකි තත්වයක් මතුවී ඇති බවයි වාර්තා වන්නේ.
මේ අතර මහනුවර ජාතික රෝහලේ එන්ජියෝග්රෑම් පරීක්ෂණ සඳහා 8000කට අධික පොරොත්තු ලේඛනයක් පවතින බව රජයේ විකිරණ විද්යා තාක්ෂණවේදීන්ගේ සංගමයේ සභාපති චානක ධර්මවික්රම මහතා පවසනවා.
එමෙන්ම කොළඹ ජාතික රෝහලේ ඇති එන්ජියෝග්රෑම් යන්ත්ර 3න් 1ක් අක්රීයව පවතින අතර තවත් යන්ත්රයක් අර්ධ ක්රියාකාරී තත්ත්වයේ පවතින බවයි ඔහු කියා සිටියා.
දිවයින පුරා රෝහල් 11ක් තුළ එන්ජියෝග්රෑම් යන්ත්ර 14ක් පවතින අතර ඉන් 3ක් කොළඹ ජාතික රෝහලේත්, 2ක් මහනුවර ජාතික රෝහලේත් පවතිනවා.
නමුත් යාපනය, පොළොන්නරුව, අනුරාධපුර, කුරුණෑගල, රාගම, කළුතර, කරාපිටිය, බොරැල්ල රිජ්වේ ආර්යා සහ පේරාදෙණිය සිරිමාවෝ බණ්ඩාරනායක යන රෝහල් සතුව එන්ජියෝග්රෑම් යන්ත්ර 1 බැගින් පවතින බවයි සඳහන් වන්නේ.
ගාල්ල, මාතර, හම්බන්තොට, බදුල්ල, රත්නපුර, දිස්ත්රික්කවල කිසිදු රෝහලක එන්ජියෝග්රෑම් යන්ත්ර නොමැති අතර එම ප්රදේශවල රෝගීන්ද කොළඹ ජාතික රෝහල වෙත පැමිණෙන අතර කොළඹ ජාතික රෝහලේ එන්ජියෝග්රෑම් යන්ත්ර ද නිසි පරිදි ක්රියාත්මක නොවන බව චානක ධර්මවික්රම මහතා ප්රකාශ කළා.