ඇෆ්ගනිස්තානයේ මේ වන විට පවතින ගැටුම්කාරී තත්වය හේතුවෙන් පසුගිය මාස තුනක කාලය තුළ පුද්ගලයන් මිලියනයක් පමණ අවතැන්වී ඇතැයි වාර්තා වේ.
එරට මානව හිමිකම් කොමිසම සදහන් කරන්නේ පවුල් 160,000කට ආසන්න සංඛ්‍යාවකට අයත් පුද්ගලයන් මෙලෙස අවතැන්ව සිටින බවයි.
තලේබාන් සංවිධානය විසින් එල්ල කරන ප්‍රහාර මෙම අවතැන්වීම්වලින් සියයට හැත්තෑවකට පමණ හේතු වී ඇති බව ද එම කොමිසම සිදුකළ විමර්ශනවලදී අනාවරණය වී තිබේ.
තලේබාන් සංවිධානය විසින් අල්ලාගත් ප්‍රදේශවල සිවිල් වැසියන් සිය ගණනින් රදවා ගැනීම්, මරා දැමීම්, වධහිංසා පැමිණවීම් සහ පහරදීම් වාර්තා වී ඇති අතර රජයට සහය දීම ඔවුන්ට එල්ල කරන ප්‍රධානතම චෝදනාව බව සදහන් වේ.
මෙම කාලසීමාව තුළදී ඇෆ්ගනිස්තානය තුළ සිවිල් පුද්ගලයන් 1659 ක් මියගොස් තවත් 3254ක් තුවාල ලබා ඇතැයිද එරට වාර්තා වැඩිදුරටත් අනාවරණය කරයි.
