අම්බලන්ගොඩ ප්‍රධාන බස් නැවැතුම්පොළේ සහ මහජනතාව වැඩි වශයෙන් ගැවසෙන ස්ථානවල ගැබිනි කාන්තාවන් යොදවා සංවිධානාත්මකව මුදල් පසුම්බි සොරකම් කිරීමේ ජාවාරමක් සිදුවන බව පොලිසිය පවසනවා.
මුලික පොලිස් පරීක්ෂණවලදී අනාවරණය වී ඇත්තේ අදාළ පිරිස හඳුන්කූරු අලෙවි කරන මුවාවෙන් මෙම සොරකම සිදු කරන බවයි.
පොලිසිය පවසන්නේ ගැබිනි කාන්තාවක් පසුගිය දිනක අම්බලන්ගොඩ බස් නැවතුම්පොළේදී කාන්තාවකගේ මුදල් පසුම්බියක් සොරකම් කරන ආකාරය ආරක්ෂිත කැමරාවක් පරීක්ෂා කිරීමේදී හෙළි වූ බවයි.
සංවිධානාත්මක කණ්ඩායම් විසින් ගැබිනි කාන්තාවන් නගරයට ගෙනැවිත් මෙම ව්‍යාපාරයේ යොදවන බව මේ වන විට අනාවරණය වී තිබෙනවා.
කෙසේ වෙතත් මෙවැනි සොරකම් සඳහා ගැබිනි කාන්තාවන් පිරිසක් අම්බලන්ගොඩ නගරයේ යොදවා ඇති බැවින් ඔවුන්ගෙන් ප්‍රවේශම් වන ලෙස අම්බලන්ගොඩ පොලිසිය නගරයට පැමිණෙන ජනතාවගෙන් ඉල්ලා සිටිනවා.
