සර්වපාක්ෂික අන්තර්කාලීන ආණ්ඩුවකට එක් වීමට ජනාධිපතිවරයා කළ යෝජනාව ජනතා විමුක්ති පෙරමුණ ප්‍රතික්ෂේප කර තිබෙනවා.
රට අර්බුදයකට පත්ව ඇති මොහොතක අමාත්‍ය ධූර භාර ගැනීම සඳහා සියලු පක්ෂවලට ආරාධනා කිරීමට යුක්ති සහගත අයිතියක් ජනාධිපතිවරයාට නොමැති බවයි ඔවුන් පවසන්නේ.
ජනතාව ඉල්ලා සිටින්නේ ගෝඨාභය රාජපක්ෂ සහ ඔහුගේ පාලනය පලවා හරින ලෙස බවත් ඒ හේතුවෙන් තම පක්ෂය මෙම යෝජනාව ප්‍රතික්ෂේප කරන බවත් ජාතික ජන බලවේගය ගොඩනැගුවේ බලය ලබා ගැනීමේ අරමුණින්ම බවද අනුර කුමාර දිසානායක පවසනවා.
ආර්ථික හා ගෝලීය කාරණා කිහිපයක් හේතුවෙන් වත්මන් අර්බුදකාරී තත්ත්වය හටගෙන ඇති බව ජනාධිපති මාධ්‍ය ඒකකය විසින් අද (04) දින නිකුත් කරනු ලැබූ නිවේදනයක දැක්වුණා.
එබැවින් උද්ගතව ඇති ජාතික අර්බුදයට විසඳුම් සෙවීමට එක්වන ලෙස සියලු දේශපාලන පක්ෂවලට ජනාධිපති ගෝඨාභය රාජපක්ෂ මහතා ඇරයුම් කර සිටියා
ආසියාවේ ප්‍රජාතන්ත්‍රවාදී රටවල් අතර ප්‍රධාන පෙළේ රටක් ලෙස ප්‍රජාතන්ත්‍රවාදී ව්‍යුහය තුළම ඊට විසඳුම් සෙවිය යුතුව ඇති බවත්, සමස්ත රටවැසියන් සහ උපනූපන් අනාගත පරපුර වෙනුවෙන් ජාතික අවශ්‍යතාවයක් ලෙස එකමුතුව ක්‍රියාකළ යුතුව ඇති බව ද එම නිවේදනයේ තවදුරටත් සඳහන් විය.
එබැවින් අමාත්‍ය ධුර භාරගෙන ජාතික අර්බුදයට විසඳුම් සෙවීමට එක්වන ලෙස පාර්ලිමේන්තුව නියෝජනය කරන සියලු දේශපාලන පක්ෂවලට ජනාධිපතිවරයා ඇරයුම් කරනු ලැබීය.
