සිව් හැවිරිදි කුඩා දැරියකගේ කටට දුම්කොළයක් ඔබා මූණ වතුර බාල්දියක ද ඔබා වේ වැලකින් පහරදී කෲරත්වයට පත් කළ පියාගේ දෙවැනි බිරිඳ අත්අඩංගුවට ගත් බව අඟුරුවාතොට පොලිසිය පවසනවා.
දැරිය පොලිස් භාරයට ගන්නා අවස්ථාවේදී සැකකාරිය විසින් දැරියගේ කටට දුම්කොළය එබිම හේතුවෙන් කතා කිරීමට අපහසු තත්ත්වයෙන් මත් ගතියෙන් සිටි බව පොලිසිය සඳහන් කරනවා.
දැරිය මේ වන විට හොරණ මූලික රෝහල වෙත ප්‍රතිකාර සඳහා යොමු කර තිබෙන අතර දැරියට පහර දීමට යොදා ගත් වේ වලද පොලිස් බාරයට ගත් බවට වාර්තා වෙනවා.
සැකකාරිය පහර දුන් බව කියන සලකුණු කිහිපයක් වම් අතේ බැලූ බැල්මට දක්නට ලැබෙන අතර ” දැරිය කියන දේ අහන්නෙ නැහැ හිතුවක්කාරයි “ඒ නිසා පහර දුන් බව සැකකාරිය පොලිස් නිලධාරීන් සිදුකළ ප්‍රශ්න කිරීම් හමුවේ පවසා තිබෙන බව සඳහන්.
දැරියගේ මව වෙනත් පුරුෂයෙක් සමග දැරිය හා පියා තනිකර මීට වසරකට පමණ පිටවී යාමෙන් අනතුරුව දැරියගේ පියා විසින් දැරියත් රැගෙන සැකකාරියගේ නිවසේ පදිංචියට පැමිණ ඇති බව පොලිස් විමර්ශනවලදී අනාවරණයවී තිබෙනවා.
