ඕස්ට්‍රේලියාවේ සමස්ථ ජනගනයෙන් 70ක්වත් පූර්ණ එන්නත්කරණයට ලක්කරනතුරු රට විවෘත කිරීමට සූදානම් නොමැති බව එරට අග්‍රාමාත්‍ය ස්කොට් මොරිසන් අවධාරණය කරන බව රොයිටර් පුවත් සේවය වාර්තා කරනවා.
ඒ, එරට වැඩිම ජනාකීර්ණ ප්‍රාන්ත දෙකක් වන නිව් සවුත් වේල්ස් සහ වික්ටෝරියා හි අගනගර වන සිඩ්නි සහ මෙල්බර්න්හි අගුලු දැමීමට එරෙහි ජන විරෝධතා පෙළපාලිවලට සහභාගී වූවන් සියගණනක් එරට පොලිස් අත්අඩංගුවට පත්ව ඇති පසුබිමකයි.
රට වසා තැබීම එරට රජයේ කොරෝනා පාලනය කිරිම සම්බන්ධ උපාය මාර්ගයේ ප්‍රධාන අංගයක් වන අතර එන්නත්කරණය 70% දක්වා ළඟා වන තුරු එය පවත්වාගෙන යන අතර අතර එම අගය 80% දක්වා ඉහළ යන විට දේශසීමා ක්‍රමයෙන් නැවත විවෘත කිරීම ඔවුන්ගේ බලාපොරොත්තුවයි.
මාධ්‍ය අමතමින් එරට අග්‍රාමාත්‍යවරයා පවසා සිටියේ රට සදාකාලිකව වසා තැබිය නොහැකි බව වැටහෙන නමුත් රට විවෘත වන්නේ එන්නත්කරණය 70% දක්වා ළඟා වීමෙන් අනතුරුව පමණක් බවත් ජනතාව වටහා ගත යුතු බවයි.
ඔස්ට්‍රේලියානු සෞඛ්‍ය අමාත්‍යාංශය විසින් සෙනසුරාදා නිකුත් කළ දත්තවලට අනුව මේ දක්වා පූර්ණ එන්නත්කරණය සිදුකර ඇත්තේ වයස අවුරුදු 16ට වැඩි පුද්ගලයන්ගෙන් 30%ක් පමණි.
එරට ජනගහනයෙන් 11%ක් එන්නත් ප්‍රතික්ෂේප කරන බව ඔස්ට්‍රේලියානු පුවත්පතක් සිදුකළ සමීක්ෂණයකින් හෙළිවූ අතර මෙයද එන්නත්කරණයට යම් බාධාවක් වී තිබේ.
