ශ්‍රී ලංකා මහ බැංකුව ප්‍රතිපත්ති පොලී අනුපාතිකය අඩු කිරීමේ වාසිය වෙළෙඳපොළට ලබාදීමට බැංකු කටයුතු කළ යුතු බව මහ බැංකු අධිපති අචාර්ය නන්දලාල් වීරසිංහ මහතා පවසනවා.
මහ බැංකු අධිපතිවරයා මේ බව කියා සිටියේ අද (06) පැවැති මාධ්‍ය හමුවකට එක්වෙමින්.
එසේ සිදු නොකළහොත් පොලී අනුපාත නියාමනය කිරීම සඳහා ක්‍රියා මාර්ග ගන්නා බවයි ඔහු සඳහන් කළේ.
ඒ මහතා පවසන්නේ බැංකු පොලී අනුපාත යම් මට්ටමකට අඩු වුවද තවදුරටත් අඩු විය යුතු බවත් ඒ සඳහා බැංකුවලට සහන කාලයක් හිමිවන බවත්ය.
එම කාලය තුළදී බැංකුව විසින් ප්‍රතිපත්ති පොලී අනුපාතිකය අඩුවීමේ වාසිය ජනතාව වෙත ලබාදෙමින් වෙළෙඳපොල පොලී අනුපාත අඩු කරනු නොලැබුවහොත් 2018 වසරේ මෙන් බැංකුවලට ඉලක්ක ලබාදීමට සිදුවන බව මෙහිදී මහ බැංකු අධිපතිවරයා සඳහන් කරනවා.
රන් උකස් ණය සහ ණය පොලී අනුපාතද මේ අනුව කාලානුරූපීව අඩු වනු ඇති බවද මහ බැංකුව කියා සිටිනවා.
මහ බැංකුව ප්‍රකාශ කළේ ශ්‍රී ලංකා මහා බැංකුවේ මග පෙන්වීම යටතේ ණය පත් පොලී අනුපාතිකය සියයට 2 කින් බැංකු අඩු කළ බවයි.
මේ අතර ප්‍රතිපත්ති පොලී අනුපාතික තවදුරටත් පහළ දැමීමට ශ්‍රී ලංකා මහ බැංකුව තීරණය කර තිබෙනවා.
මේ අනුව නිත්‍ය තැන්පතු පහසුකම් අනුපාතිකය (SDFR) සහ නිත්‍ය ණය පහසුකම් අනුපාතිකය (SLFR) පිළිවෙළින් 11% සහ 12% දක්වා පදනම් අංක 200 කින් තවදුරටත් අඩු වෙන බවයි සඳහන් වන්නේ.
ඊයේ (05) රැස්වූ ශ්‍රී ලංකා මහ බැංකුවේ මුදල් මණ්ඩලය විසින් එම තීරණය ගෙන තිබෙනවා.
මේ අතර පසුගිය මැයි 31 වනදා ශ්‍රී ලංකා මහ බැංකුවේ මුදල් මණ්ඩලය විසින් ප්‍රතිපත්ති පොලී අනුපාතික වාර්තාගත ලෙස පහත දැමීමට තීරණය කර තිබුණා.
