කොවිඩ් සමයේදී ලබාදුන් AstraZeneca එන්නතින් ඇතිවිය හැකියැයි කියන බරපතල අතුරු ආබාධ ගැන සඟවමින් ජනතාවට එන්නත් ලබා ගන්නා ලෙසට බලපෑම් කිරීම තුලින් මූලික අයිතිවාසිකම් කඩවී ඇති බවට තරුණ ජනමාධ්‍යවේදීන්ගේ සංගමය පවසනවා.
ඒ අනුව මෙම සමස්ත ක්‍රියාධාමය ගැන විධිමත් පරීක්ෂණයක් ආරම්භ කරන ලෙස ඉල්ලා තරුණ ජනමාධ්‍යවේදීන්ගේ සංගමය විසින් මානව හිමිකම් කොමිෂන් සභාවේ සභාපති ශ්‍රේෂ්ඨාධිකරණ විනිසුරු (විශ්‍රාමික) එල් ටී බී දෙහිදෙණිය මහතා වෙත ලිපියක් යොමු කර තිබෙනවා.
ශ්‍රී ලංකාවේ කොවිඩ් වසංගතය පැවැති සමයේ රජය විසින් එන්නත්කරණය අනිවාර්ය කර තිබුණු අතර එන්නත් නොමැතිව පොදු ස්ථානවලට පැමිණීමට ඉඩ නොදෙන බවට ද නිවේදනය කර තිබුණා.
ඒ අනුව රජයේ මෙම බලපෑම හමුවේ බොහෝ දෙනෙක් එන්නත්කරණය සඳහා යොමු වූ බවට ඔවුන් පෙන්වා දෙනවා.
තවද ඔවුන් පවසන්නේ කොවිඩ් වසංගතය පැවැති කාලයේ දී ලබා දුන් එන්නත්වලින් පසු හෘදයාබාධ සහ එක්තැන්වීම් ආදිය වැඩිවූ බවට ශ්‍රී ලංකාවේ කතාබහක් පැවැතිය ද එය ඒ දිනවලම යටපත් වී ගිය අතර AstraZeneca එන්නතෙන් පසු දරුණු අතුරු ආබාධ ඇතිවිය හැකි බවට එම සමාගම පිළිගත් බව පවසමින් ‘දිවයින’ පුවත්පත සහ දෙස් විදෙස් මාධ්‍ය කිහිපයක් වාර්තා කර තිබෙන බවයි.
ඒ අනුව AstraZeneca සහ අනිකුත් කොවිඩ්වලට එරෙහි එන්නත් ලංකාවට ගෙන එද්දි නිසි පර්යේෂණයක් සිදුවී ඇත්ද යන්න ගැන මේ වන විට බරපතල සැකයක් ඇතිවී තිබෙන බැවින් මේ සම්බන්ධයෙන් විධිමත් පරීක්ෂණයක් ආරම්භ කරන ලෙස ඉල්ලා මෙම ලිපිය යොමු කර තිබෙනවා.
