එමිරේට්ස් ගුවන් සේවාවට අයත් EK 664 දරණ ගුවන් යානයෙන් විදේශගතවීම සඳහා අද (12) අලුයම කටුනායක ගුවන් තොටුපළට පැමිණි බැසිල් රාජපක්ෂ මහතාට එහි සිටි ගුවන් මගීන්ගෙන් එල්ල වූ විරෝධතාව හමුවේ මෙරටින් පිටව යාමට නොහැකි වූ බව වාර්තා වනවා.
අදාළ ගුවන් යානය කොළඹ සිට ඩුබායි දක්වා ගමන් ගන්නා බවත් ඉන් අනතුරුව EK 231 ගුවන් යානයෙන් ඔහු ඇමරිකාවේ වොෂින්ටන් බලා පිටත්ව යාමට නියමිත බවත් වාර්තා වුණා.
මේ අතර බැසිල් රාජපක්ෂ ඊයේ කටුනායක ගුවන් තොටුපොළට පැමිණ විශේෂ අමුත්තන්ගේ ප්‍රභූ පර්යන්තයේ සිටින බවට පැවසෙන ඡායාරූප පෙළක් මේ වන විට සමාජ මාධ්‍ය තුළ සංසරණය වනවා.
මේ අතර කටුනායක බණ්ඩාරනායක ජාත්‍යන්තර ගුවන් තොටුපොළ තුළ මුදල් ගෙවා ප්‍රභූවරුන් සිය ගුවන් ගමන් පහසුකම සලසා ගන්නා සේද මාවත මගී නිෂ්කාශන පර්යන්තයේ රාජකාරී කටයුතුවලින් ශ්‍රී ලංකා ආගමන විගමන දෙපාර්තමේන්තු නිලධාරීන් ඉවත් වී තිබෙනවා.
ආගමන විගමන දෙපාර්තමේන්තු නිලධාරීන්ගේ සංගමයේ සභාපති කේ.ඒ.ඒ.එස් කණුගල මහතා සඳහන් කළේ, සිය නිලධාරීන්ගේ ආරක්ෂාව සම්බන්ධයෙන් මතුව ඇති ගැටලුවක් මත එම තීරණය ගෙන ඇති බවයි.
