හෙට දිනයට යෙදී තිබෙන වැලන්ටයින් දිනය හෙවත් ආදරවන්තයන්ගේ දිනයේදී අලෙවි කිරීම සඳහා නැවුම් රෝස මල් 45,000 ක් මේ වන විට සූදානම් කර අවසන් බව කප්රුක ව්‍යාපාරයේ අධිපති දුලිත් හේරත් මහතා නිවේදනය කරනවා.
ඒ අනුව අන්තර්ජාලය හරහා සිය භාණ්ඩ අලෙවිකරන ව්‍යාපාරයක් වන කප්රුක හරහා මෙම රෝසමල් ඇණවුම් කරන පෙම්වතුන් හට ඒවා නිවසටම ලබාදීමට සූදානම් කර තිබෙනවා.
වැලන්ටයින් දිනය ලෙසින් දිනයක් සැමරීම මීට වසර කිහිපයකට පෙර වාණිජ අරමුණින් මෙරටට හදුන්වාදුන් අතර ඊට පෞද්ගලික මාධ්‍ය ආයතන විශාල ප්‍රචාරණයක් ලබාදුන්නා.
එහිදී වැලන්ටයින් දිනය සමරා විවිධ වැඩසටහන්, තරඟ යනාදිය සංවිධානය කෙරුණු අතර ඊට ව්‍යාපාරිකයන්ද අනුග්‍රාහකත්වය ලබාදී එම පෙම්වතුන්ට විවිධ දෑ අලෙවි කරමින් තම ව්‍යාපාර වර්ධනය කරගැනීමට පටන් ගත්තා.
මේ වන විට වැලන්ටයින් දිනය හෙවත් ආදරවන්තයන්ගේ දිනය දැවැන්ත ව්‍යාපාරික දිනයක් බවට පත්ව ඇති අතර එය ඉලක්ක කරගනිමින් ස්වර්ණාභරණ ආයතන, අන්තර්ජාලය හරහා භාණ්ඩ අලෙවිකරන ආයතන, මාධ්‍ය ආයතන, හෝටල්, ආපන ශාලා, ඇදුම් සාප්පු යනාදී බොහෝ ව්‍යාපාරික ආයතන විවිධ වැඩසටහන් ක්‍රියාත්මක කරනවා.
