2025 වර්ෂය වන විට ශ්‍රී ලංකාව කජුවලින් ස්වංපෝෂිත කර ඒවා විදේශ වෙළෙඳපොළ වෙතද යැවීමට කටයුතු කරන බව කජු සංස්ථාවේ සභාපතිනී නීතිඥ සාරංගා රත්නායක මහත්මිය පවසනවා.
ඇය සදහන් කරන්නේ මේ වන විට කජු ආනයනය සම්පූර්ණයෙන්ම තහනම් කිරීමට ජනාධිපති ගෝඨාභය රාජපක්ෂ මහතා කටයුතු කර ඇති බවයි.
2020 හා 2021 යන වසරවලදී කජු සංස්ථාව මගින් අක්කර 20,000 කට ආසන්න ප්‍රමාණයක් වගා කර ඇති බවත් 2025 වසර වන විට මෙරට අලුතින් කජු අක්කර 35,000 ක් වගා කිරීමට අපේක්ෂිත බවත් ඇය සදහන් කරනවා.
ඒ සඳහා 2021 අයවැයෙන් මුදල් අමාත්‍ය බැසිල් රාජපක්ෂ මහතා විශාල මුදලක් වෙන්කර ඇතැයි සාරංගා රත්නායක මහත්මිය පෙන්වා දෙනවා.
මේ වන විට කජු පුහුලන් යොදාගෙන වයින් නිෂ්පාදනය කිරීම සඳහා වන සියලුම රසායනාගාර පරීක්ෂණ සිදුකර අවසන් බැවින් කජු වාරය වන එළැඹෙන අප්‍රේල් මාසයේ කජු වයින් නිෂ්පාදනය කර වෙළෙඳපොළට නිකුත් කරන බව ඇය වැඩිදුරටත් සදහන් කරනවා.
