වර්ධනය වෙමින් පවතින ආරක්ෂක තර්ජනවලට මුහුණ දීම සඳහා මැද පෙරදිග රටවල් ඔවුන්ගේ ආයුධ සැපයුම්කරුවන් විවිධාංගීකරණය කිරීමට කටයුතු කර ඇති බවත් එහිදී වැඩිවන ඉල්ලුම සැපයීමට චීනය ස්ථානගත වී ඇති බවත් වාර්තා වේ.
මේ අතර, චීනය ඉරානයේ නියෝජිතයන් අතට ඔවුන්ගේ තාක්ෂණය ඇතුළු වීම වැළැක්වීමට කිසිවක් නොකරන බවට අන්තර්ජාතික ප්‍රජාවෙන් චෝදනාවක් එල්ල වී තිබේ.
ආසන්න පෙරදිග කටයුතු පිළිබඳ එක්සත් ජනපද සහකාර රාජ්‍ය ලේකම් බාබරා ලීෆ් පවසා ඇත්තේ, මෑත වසරවලදී ඉරාන සහය ලබන සන්නද්ධ කණ්ඩායම් විසින් භාවිතා කරන ලද මිනිසුන් රහිත සන්නද්ධ වාහන (UAVs) චීනය විසින් සපයා ඇති බවයි.
මේ අතර ඉරාන විප්ලවීය ආරක්ෂක බළකාය (IRGC) චීනයෙන් ඩ්‍රෝන යානා ලබාගෙන ඉරාකය, සිරියාව, ලෙබනනය සහ යේමනය පුරා පැතිරී ඔවුන්ට හිතවාදී සන්නද්ධ කණ්ඩායම් වෙත ලබා දීමට ඒවා නැව්ගත කරන බව ද වාර්තා වේ.
විශේෂයෙන්ම චීනය විසින් සපයන ලද ඩ්‍රෝන යානා, ඉරානයේ පිටුබලය ලබන ත්‍රස්තවාදී සංවිධානවල අවි ගබඩාවල ප්‍රධාන කොටස් බවට පත්ව ඇති බව පැවසේ.
2019 දී යේමනයේ ඉරාන පිටුබලය ලබන හූතිවරු සෞදි තෙල් නිෂ්පාදන ස්ථානවලට ප්‍රහාර එල්ල කිරීම සඳහා මෙම ඩ්‍රෝන යානා යෙදවූ බව සදහන් වේ.
2022 අගෝස්තු මාසයේදී ඉරානයේ සහාය ඇති ත්‍රස්තවාදීන් ගිනිකොනදිග සිරියාවේ එක්සත් ජනපද හමුදා මුරපොලවල් වෙත ද ඩ්‍රෝන ප්‍රහාරයක් එල්ල කර ඇත්තේ මෙම යානා යොදාගනිමින් බව පැවසේ.
දෘඩාංගවලට අමතරව, ඩ්‍රෝන ක්‍රියාකාරිත්වය වැඩි දියුණු කිරීම සඳහා චීනය ඉරානයට නවීන චන්ද්‍රිකා සහ සන්නිවේදන තාක්ෂණය සපයනු ලබන බව ද සදහන් වේ.
