සොලමන් දූපත් සහ චීනය අතර අත්සන් තබා ඇති ආරක්ෂක ගිවිසුම සම්බන්ධයෙන් ඕස්ට්‍රේලියාව සහ නවසීලන්තය ඔවුන්ගේ කනස්සල්ල මතු කර තිබේ.
ඒ, එමගින් ඉන්දු-පැසිෆික් කලාපය තුළට චීන හමුදාවට පැමිණීමට ඉඩ සලසන බව සදහන් කරමිනි.
මෙමගින් ඉන්දු පැසිෆික් කලාපයේ චීනයේ යුධ ක්‍රියාකාරකම් වැඩිවීම මෙන්ම කලාපය අස්ථාවර කළ හැකි තත්වයන් නිර්මාණය විය හැකි බව ඕස්ට්‍රේලියාව සහ නවසීලන්තය පෙන්වා දී තිබේ.
ගිවිසුමත් සමග සොලමන් දූපත් චීන හමුදා සඳහා උපායශීලී නැවතුම්පොළක් ලෙස ද භාවිතා කළ හැකි බව ද සදහන් වේ.
ඕස්ට්‍රේලියාව සහ නවසීලන්තය මෙසේ සිය කනස්සල්ල පළ කර ඇත්තේ මාර්තු 24 වන විට, සොලමන් දූපත් සහ චීනය ආරක්ෂක ගිවිසුම අත්සන් කර ඇති බව පසුගිය දා හෙළිවීමත් සමගිනි.
ඕස්ට්‍රේලියාව බිය ගැන්වීම සඳහා සොලමන් දූපත්වල නාවික කඳවුරක් ඉදිකිරීම චීනයේ අභිප්‍රාය බව ඕස්ට්‍රේලියානු නියෝජ්‍ය අගමැති බාර්නබි ජොයිස් සදහන් කරයි.
සොලමන් දූපත් කෙරෙහි චීනයේ බලපෑම අවම කිරීම සඳහා ඕස්ට්‍රේලියාව එරටට මීට පෙර යටිතල පහසුකම් සංවර්ධනය සදහා විශාල වශයෙන් ආධාර ලබා දී තිබිණ.
