හෘදයාබාධයක් හේතුවෙන් මිය ගිය කාන්තාවකගේ දේහයක් කොවිඩ් ආසාදිත නොවන බව පවසමින් අවසන් කටයුතු සඳහා ඥාතීන්ට භාර දුන්නද පසුව ඇය කොවිඩ් ආසාදිතව සිටි බවට රෝහලෙන් දැනුම් දුන් පුවතක් මාතර – දෙවිනුවර සෞඛ්ය වෛද්ය බලප්රදේශයෙන් වාර්තා වනවා.
මෙලෙස මියගොස් ඇත්තේ මාතර – ගන්දරාවත්ත – කුරුඳුතොටවත්ත ප්රදේශයේ පදිංචි 75 හැවිරිදි කාන්තාවක්.
මෙම කාන්තාවට පසුගිය සැප්තැම්බර් 28 වනදා උදෑසන පපුවේ ඇතිවූ වේදනාවක් හේතුවෙන් මාතර මහ රෝහලට ඇතුලත් කර තිබෙනවා.
රෝහලට ඇතුළත් කිරීමේදීම ඇය මියගොස් සිට ඇති අතර පසුව සිදුකරන ලද රැපිඩ් ඇන්ටිජෙන් පරීක්ෂණයේ ප්රතිපල අනුව රෝහලෙන් පවසා ඇත්තේ ඇය කොවිඩ් ආසාදිත කාන්තාවක් නොවන බවයි.
පසුව ඇයගේ දේහය සම්බන්ධ මරණ පරීක්ෂණය මාතර මහ රෝහලේදී සිදුකර මෙම කාන්තාව හෘද්යාබාධයක් හේතුවෙන් ජීවිතක්ෂයට පත්ව ඇති බවට වාර්තාවක්ද සහිතව දේහය ඥාතීන් වෙත භාරදී තිබෙනවා.
පසුගිය 28 වනදා රාත්රියේ ඇයගේ දේහය දෙවිනුවර – කුරුඳුතොටවත්තේ පිහිටි නිවෙසට රැගෙනවිත් ඇති අතර දේහය පිළිබදව අවසන් කටයුතු අද (30) දිනයේ සිදුකිරීමට නියමිතව තිබුණා.
තත්ත්වය එසේ තිබියදී මියගිය කාන්තාවගේ භාරකරු වශයෙන් රෝහලට විස්තර ලබාදුන් මියගිය තැනැත්තියගේ ලේලියට අද (30) දින උදෑසන දෙවිනුවර සෞඛ්යය වෛද්ය නිළධාරී කාර්යාලයේ නිළධාරීන් දැනුම්දී ඇත්තේ ඇත්තේ මිය ගිය කාන්තාව කොවිඩ් ආසාදිතව සිටි බවයි.
පසුව දෙවිනුවර සෞඛ්යය වෛද්ය නිළධාරී කාර්යාලයේ නිළධාරීන්ගේ මැදිහත්වීම මත දේහය සම්බන්ධයෙන් අවසන් කටයුතු අද පස්වරු 2ට දෙවිනුවර පොදු සුසානභූමියේදී සිදුකළා.
කෙසේ වෙතත් 28 වනදා රාත්රියේ සිට ඇයගේ නිවසේ තබා තිබූ දේහයට අවසන් ගෞරව දැක්වීම සඳහා විවිධ ප්රදේශවලින් බොහෝ පිරිසක් පැමිණ ඇති බවට ප්රදේශවාසීන් පවසනවා.
මියගිය කාන්තාව සම්බන්ධයෙන් PCR පරීක්ෂණයක් සිදුකර එහි ප්රතිපල එනතෙක් රෝහලේ මෘතදේහය රඳවා නොගෙන කළබලයේ ඥාතීන්ට භාරදී විශාල පිරිසක් අනතුරට ලක්කිරීම සම්බන්ධයෙන් ප්රදේශවාසීන් මාතර මහ රෝහලේ පරිපාලනය වෙත දැඩි අප්රසාදය පලකර සිටිනවා.