දිනෙන් දින උග්‍ර වන ආර්ථික අර්බුදය හමුවේ, තමන්ට අවශ්‍ය ආහාර තමන් විසින්ම නිපදවා ගැනීමේ වගා සංග්‍රාමයක් ‘ත්‍රෛලෝ ත්‍රිවිධ පෙරමුණ’ නම් සංවිධානයක් විසින් මගින් ආරම්භ කර තිබෙනවා.
‘ත්‍රෛලෝ ත්‍රිවිධ පෙරමුණේ සභාපති කායවර්ධන සහ යෝගා උපදේශක සංජය දිසානායක පවසන්නේ ආහාර අර්බුදයක් මතුවිය හැකි බව කල් තබාම අවබෝධ කරගෙන අනුරාධපුර කලා වැව ආසන්නයේ ඇති කුඹුරු කොටසක් ද ඇතුළු අක්කර හය හමාරක පමණ ඉඩමක් මිලට ගෙන සිය සංවිධානය විසින් තමන්ට අවශ්‍ය ආහාර තමන් විසින්ම නිපදවා ගැනීමේ සැලසුම ක්‍රියාත්මක කළ බවයි.
එම පෙරමුණෙහි ලේකම් තරිඳු මැන්දිස් පවසන්නේ මේ වන විට ඔවුන් සිය වගා බිමෙහි වී, මිරිස්, තක්කාලි, කහ, එළවළු වර්ග ආදී එදිනෙදා නිවසට අවශ්‍ය බොහෝ ආහාර බෝග වගා කර ඇති බවයි. මෙය කාබනික වගාවක් ලෙස පවත්වාගෙන යාම ද විශේෂත්වයකි.
ඉදිරියේදී මෙහි කිරිගවයින්, කිකිළියන් ආදී සතුන් ද ඇතිකරමින් කිරි බිත්තර ආදියද නිෂ්පාදනය කිරීමට සැලසුම් කර ඇති බවත් ඔහු සඳහන් කරනවා.
පෞද්ගලික අංශයේ කළමනාකරුවන් ඡායාරූප ශිල්පීන් හා ජ්‍යෙතිෂවේදින් හා විශ්ව විද්‍යාල සිසුන් ඇතුළු තරුණ පිරිසක් මෙම කාර්යෙහි නිරතව සිටින අතර සරල, සුවදායී, නිරෝගී දිවියක් උදා කර ගැනීම සඳහා මෙම ව්‍යාපෘතියට එක්වන අයගේ නිවෙස්වලට අවශ්‍ය ආහාර ද්‍රව්‍ය වස විසෙන් තොරව හා පහසුවෙන් සපයා ගැනීම මෙම පෙරමුණෙහි අරමුණ වී තිබෙනවා
මෙම ක්‍රියාවලියට දැනට 15 දෙනකු පමණ මේ සඳහා සම්බන්ධ වී සිටින බවත්, ඉදිරියේදී තවත් පුළුල් කිරීම තම සංවිධානයේ අරමුණ බවත් වසර ගණනාවක් තිස්සේ සිදුකරන ලද පර්යේෂණවලින් සාර්ථක ප්‍රතිඵල ලැබීමෙන් පසුව මෙම ව්‍යාපෘතිය ආරම්භ කළ බවත් මෙහිදී නිශ්පාදනය කෙරෙන සියලු දෑ සාමාජිකයන් අතර බෙදාගන්නා බවත් තරිඳු මැන්දිස් පවසනවා.
මෙම ව්‍යාපෘතියට ඕනෑම අයකු දායකවිය හැකි බවයි එම සංවිධානය පවසන්නේ.
