එක්සත් ජනපදය විසින් තම රටට ඉහළ අහසේ ඔත්තු බැලූ චීන බැලූනයක් විනාශ කර සති කිහිපයකට පසු, අනාගතයේදී එවැනි තත්වයකට මුහුණ දීම සඳහා සම්මත මෙහෙයුම් ක්රියා පටිපාටි සකස් කිරීම සම්බන්ධයෙන් ඉන්දීය ආරක්ෂක අංශ ද මේ වන විට සාකච්ඡා කරමින් සිටී.
මීට වසරකට ඉහතදී අන්දමන් ප්රදේශයට ඉහළින් මෙවැනිම බැලූනයක් ඉන්දීය හමුදා විසින් ද දැක තිබුණද, දින තුන හතරකට පසු එය ඉවතට පාවී යන තුරු කිසිදු ක්රියාමාර්ගයක් නොගැනීම පිළිබඳවද සාකච්ඡාවට ලක්ව තිබේ.
එවැනි බැලූන හැසිරවීමේ යාන්ත්රණයක් තිබිය හැකි බවත් අයිතිකරුට අවශ්ය ප්රදේශය මත ස්ථාවර කළ හැකි බවත් දැන් පැහැදිලි වෙමින් තිබේයැයි ආරක්ෂක අංශ නිලධාරීන් උපුටා දක්වමින් විදෙස් මාධ්ය වාර්තා කර ඇත.
ඉදිරියේදී මෙවැනි බැලූන් සම්බන්ධයෙන් කටයුතු කරන්නේ කෙසේද යන්න පිළිබඳවත්, අවශ්ය නම් කුමන ආකාරයේ අවියක් හෝ වේදිකාවක් යොදාගෙන ඒවා ඉලක්ක කර පහර දෙන්නේද යන්න පිළිබඳවත් සාකච්ඡා කෙරෙන බවද ඉන්දීය ආරක්ෂක අංශ පවසයි.
රටේ ඕනෑම ස්ථානයකට ඉහළින් හෝ ඒ ආසන්නයේ ඇති එවැනි වස්තූන් හඳුනා ගැනීම සඳහා පවතින රේඩාර් ජාලය භාවිතා කිරීම පිළිබඳව ද හමුදාව සාකච්ඡා ආරම්භ කර තිබේ.
අඩි 60,000 ට වඩා ඉහළින් ක්රියාත්මක වන එවැනි පියාසර වස්තූන් සම්බන්ධ ජාත්යන්තර නීති ද අධ්යයනය කරමින් සිටින බව නිලධාරීන් පෙන්වාදී ඇත.
අමෙරිකානු අහසට ඉහළින් තිබූ බැලූනය බිම හෙළීමෙන් පසු ඉන්දීය ආරක්ෂක නිලධාරීන් ප්රකාශ කර ඇත්තේ, කාලයකට පෙර, අන්දමන් දූපත්වලට ඉහළින් බැලූන ආකාරයේ සුදු පැහැති වස්තුවක් නිරීක්ෂණය වූ බවයි.