අනුරාධපුරයේ ඓතිහාසික ජේතවනාරාම පුදබිමෙහි උතුරු දොරටුව ප්‍රදේශයේ රථගාලක් ඉදිකිරීමට යැයි පවසමින් බැකෝ යන්ත්‍ර යොදාගෙන පස් හාරා ඉවත්කර තිබෙනවා.
අඩි දෙකහමාරක් තුනක් පමණ ගැඹුරට මේ වන විටත් බැකෝ යන්ත්‍ර ආධාරයෙන් පස් හාරා ඇති අතර මේ හේතුවෙන් භූගත් ස්මාරකවල කොටස් ගැලවී එ්වාගේ පැරණි ගඩොල් කැබලිද ඉවතට පැමිණ ඇති බව පුරාවිද්‍ය නිලධාරීන් පවසනවා.
මධ්‍යම සංස්කෘතික අරමුදල පවසන්නේ මෙම ස්ථානයේ රථගාලක් ඉදිකිරීම සඳහා මධ්‍යම සංස්කෘතික අරමුදලේ අධ්‍යක්ෂ ජනරාල්වරයා අනුමැතිය ලබාදී ඇති බවයි.
නමුත් මේ ආකාරයෙන් විශාල බැකෝ යන්ත්‍ර යොදාගනිමින් පුරාවිද්‍යා භූමියේ පස් ඉවත්කිරීමට අවසර ලබා නොදුන්බව මධ්‍යම සංස්කෘතික අරමුදල පවසනවා.
ලෝකයේ උසම ස්ථූපය ලෙස සැලකෙන ජේතවනාරාම දාගැබ මහසෙන් රජ සමයේ නිර්මානය කරන ලද දැවැන්ත ඉදිකිරීමකි.
ජේතවනාරාමය නමින් හඳුන්වන ස්ථූපය පමණක් නොව එම ස්ථූපය කේන්ද්‍රකොටගෙන එහි අවට ඉදිකර තිබුණු ගොඩනැගිලි සහිත ආර්ථික සංකීරණය ජේතවනය ලෙස හඳුන්වනු ලබයි.
මෙම ස්ථූපය ගොඩොල්වලින් ඉදිකරන ලද්දක් වන අතර මෙය අක්කර 8 ක හතරැස් මළුවක පිහිටා ඇත.
