වීසා කාලය ඉක්මවා ඇති විදේශීකයින්ගෙන් වීසා ගාස්තුවලට අමතරව අතිවාස කාලසීමාව සදහා අය කරනු ලබන දඩ මුදල අඩු කිරීමේ නියෝගවලට අමාත්යාංශයීය උපදේශක කාරක සභාවේ අනුමැතිය හිමිව තිබෙනවා.
මහජන ආරක්ෂක කටයුතු පිළිබඳ අමාත්යාංශයීය උපදේශක කාරක සභාව එහි සභාපති අමාත්ය ටිරාන් අලස් මහතාගේ ප්රධානත්වයෙන් රැස්වූ අතර එහිදි මෙම අනුමැතිය හිමිව තිබෙන බව සඳහන් වෙනවා.
ඒ අනුව වීසා කාලය දීර්ඝ කරගැනීමකින් තොරව වලංගු වීසා කාලසීමාව ඉක්මවා දින 7ක් හෝ අඩු කාලයක් තුළ රටින් පිටවන විදේශීකයින් සඳහා දඩ මුදල් අය නොකිරිමට තීරණය කර තිබෙන අතර අතිවාස කාලසීමාව දින 7කට වැඩි සහ දින 14ක් හෝ ඊට අඩු කාලසීමාවක් සදහා අමෙරිකානු ඩොලර් 250ක මුදලක් අය කිරීමටත් අතිවාස කාලසීමාව දින 14කට වැඩි කාලසීමාවක් සදහා අමෙරිකානු ඩොලර් 500ක දඩ මුදලක් අය කිරිමටයි ප්රතිපාදන සකස් කර තිබෙනවා.
ආයෝජකයින් ආකර්ශනය කරගැනීම සහ මෙරට තුළ ක්රියාත්මක විදේශ දූත මණ්ඩලවල සේවයේ නියුතු නිලධාරීන් හට දඩ මුදල් ගෙවීම හේතුවෙන් සිදුවන අපහසුතා සැලකිල්ලට ගෙන මෙම සංශෝධන සිදුකර තිබෙන බව සඳහන් වෙනවා.
වලංගු වීසා කාලය ඉක්මවා ඇති විදේශිකයන්ගෙන් වීසා ගාස්තු වලට අමතරව අතිවාස කාල සීමාව සඳහා මීට පෙර අමෙරිකානු ඩොලර් 500ක මුදලක් අයකර තිබෙනවා.