ශ්‍රී ලංකාවේ සිට ඊශ්‍රායලයට පැමිණෙන ශ්‍රී ලාංකික ගුවන් මගීන්ට ගුවන් සේවා යළි ආරම්භ කළ බව ඊශ්‍රායලයේ ශ්‍රී ලංකා තානාපති නිමල් බණ්ඩාර පවසනවා.
පසුගිය 13 වන දා ඊශ්‍රායලයට එල්ල වූ ඉරාන මිසයිල් ප්‍රහාර හා ගුවන් සීමා වසාදැමීම හේතුවෙන් තාවකාලිකව අත්හිටුවන ලද ගුවන් ගමන් මෙසේ යළි ආරම්භ කර තිබෙනවා.
තානාපතිවරයාට අනුව, ආකියා (Arkia) ගුවන් සමාගමේ ගුවන්යානයක් අප්‍රේල් මස 18 වන දා පෙරවරුවේ කොළඹ සිට ටෙල් අවිව් බලා පැමිණීමට නියමිතයි.
AIR-INDIA ගුවන් යානා ද නවදිල්ලි නුවර සිට ටෙල් අවිව් දක්වා අප්‍රේල් මස 18 වන දා සිට යළිත් ආරම්භ වන අතර කොළඹ සිට නවදිල්ලිය හරහා ද ඊශ්‍රායලයට පැමිණෙන මගීන්ට එම යානා මගින් පැමිණීමට හැකියාව ලැබෙනවා.
FLY DUBAI ගුවන් සේවය ද ඊශ්‍රායලය දක්වා ඩුබායි හා අබුඩාබි සිට ගමන් ආරම්භ කරන බැවින් ශ්‍රී ලාංකිකයන්ට එම ගුවන් යාන හරහා ද පැමිණීමට හැකියි.
කෙසේවෙතත්, දැනට ගුවන් ගමන් ප්‍රවේශ පත්‍ර ලබාගෙන ඇති මගීන් ගුවන්තොටුපළට යාමට පෙර තම ප්‍රවේශ පත්‍රය නැවත සනාථ කර ගන්නා ලෙස තානාපති නිමල් බණ්ඩාර මහතා තවදුරටත් දැනුම් දෙනවා.
