රටක් ගොඩ නැගීම එක් පුද්ගලයෙකුක කිරීමට කළ හැකි දෙයක් නොවන බවත් එය සාමූහිකව දැරිය යුතු ප්‍රයත්නයක් බවත් ජාතික ජන බලවේගය පවසනවා.
එම පක්ෂයේ ජාතික ලැයිස්තු පාර්ලිමේන්තු මන්ත්‍රීනී හරිනි අමරසූරිය පෙන්වා දෙන්නේ රටක ගැටළු පුද්ගලයෙකුට යම් ‘මැජික් බලයකින්’ ක්ෂණිකව විසඳිය හැකි බවට දිගින් දිගටම විශ්වාස කිරීම නතර කළ යුතු බවයි.
ඇය මේ බව ප්‍රකාශ කර සිටියේ අද (26) දින පැවති මාධ්‍ය හමුවක් අමතමින්. මෙහිදී වැඩිදුරටත් අදහස් දැක්වූ මන්ත්‍රීවරිය,
“දැන් අපිට කියනවා මේ අර්බුද ඔක්කොම විසඳෙනවා. ඇයි විසඳෙන්නේ? බැසිල් රාජපක්ෂ මහත්තයා එනවා. දැන් ඔහු තමයි මේ ප්‍රශ්න ඔක්කොම විසඳන්නේ. දැන් මෙච්චරකල් අපිට කිව්වා ගෝඨාභය රාජපක්ෂ තමයි ඔක්කොම ප්‍රශ්න විසඳන්නේ කියලා. ඊට කලින් කිව්වා මහින්ද කියලා. දැන් බැසිල් හිටපු නැති එක තමයි මේ රටේ ප්‍රශ්න වලට හේතුව. එක්කෙනෙක් ෆේල් වෙනකොට එක්කෙනෙක් එලියට දානවා. දැන් මේ රටේ රාජපක්ෂවරු විතරද ඉන්නේ? කවදද තේරුම් ගන්නේ මේ ප්‍රශ්න විසඳන්න මැජික්කාරයෝ කවුරුවත් නැති බව?
මේ රට ෆේල් වෙලා තියෙන්නේ රටේ දේශපාලන අධිකාරිය විසින් ක්‍රමක්‍රමයෙන් තමන්ගේ බලව්‍යාප්තිය වෙනුවෙන් රටේ සියළු පද්ධතීන් මෙහෙයවීම නිසා. උඩින් වැටෙන පුද්ගලයෙක්ට මේක විසඳන්න බෑ කියන එක ඕනවටත් වඩා ඔප්පු වෙලා තියෙන්නේ. මේකට අවශ්‍ය වෙන්නේ සුදුසු සහ ප්‍රතිපත්තිගරුක පිරිසක්. එක පුද්ගලයෙක් නෙවෙයි.”
