කෙහෙළිය රඹුක්වැල්ල මහතාට එරෙහිව විශ්වාසභංග යෝජනාව ඉදිරිපත්වීමත් සමඟ එම අමාත්‍යධූරය ඔහුගෙන් ඉවත් කර තමන්ට ලබා දෙන්නැයි මන්ත්‍රීවරුන් සිවු දෙනෙකු ජනාධිපතිවරයාගෙන් පසුගිය දිනවල දැඩි ලෙස ඉල්ලීම් කර ඇති බව වාර්තා වෙනවා.
රජයේ අරාංචි මාර්ග සඳහන් කළේ මින් එක් අයෙකු විපක්ෂයේ ප්‍රබල මන්ත්‍රීවරයකු වන අතර ඔහු දිගින් දිගටම එම ධූරය ඉල්ලා සිටි බවයි.
කෙසේ වෙතත් ජනාධිපතිවරයා ඒ සම්බන්ධයෙන් මෙතෙක් කිසිදු ප්‍රතිචාරයක් දක්වා නැති බවද වාර්තා වෙනවා.
සෞඛ්‍ය අමාත්‍ය ධූරය සම්බන්ධයෙන් අදහස් දැක්වූ මහනුවර දිස්ත්‍රික් පාර්ලිමේන්තු මන්ත්‍රී මහින්දානන්ද අලුත්ගමගේ මහතා පැවසූවේ මේ තනතුර ලබාගැනීමට විපක්ෂයේ මන්ත්‍රීවරයකු සහ ඔහුගේ පුතා ඇඳුම් පවා මසා සූදානම්ව සිටින බවයි.
කෙහෙළිය රඹුක්වැල්ල මහතා ඉවත් කිරීම සෞඛ්‍ය ක්ෂේත්‍රයේ අර්බුදයට විසඳුමක් නොවන බව ආණ්ඩුවේ සහ විපක්ෂයේ මන්ත්‍රීවරුන් පිරිසක් සෞඛ්‍ය අමාත්‍යවරයාට එරෙහි විශ්වාසභංගය ඉදිරිපත්වීමෙන් අනතුරුව රජයට දැනුම්දී ඇති බවද ආරංචි මාර්ග වාර්තා කරනවා.
මේ අතර ජනාධිපති කාර්යාල ආරංචි මාර්ග සඳහන් කරන්නේ අමාත්‍ය මණ්ඩල සංශෝධනය මේ වසරේදී සිදු නොකෙරෙන බවයි.
මුදල් අර්බුදයක් පවතින අවස්ථාවක ඇමැතිධුර පත් කිරීමට හැකියාවක් නැති බව ජනාධිපතිවරයාගේ අදහස වී ඇති බව අදාළ ආරංචි මාර්ග වැඩිදුරටත් පවසනවා.
