සම්පුර්ණයෙන්ම එන්නත් කර ඇති සංචාරකයින්ට සහ නිරෝධායන කාලය සම්පූර්ණ කළ සංචාරකයන්ට ජෛව බුබුලෙන් ඉවත් වී දිවයිනේ සෙසු ප්‍රදේශවල සංචාරය කිරීම සඳහා සෞඛ්‍ය සේවා අධ්‍යක්ෂ ජනරාල්වරයා අවසර ලබා දී ඇති බව සන්ඩේ ටයිම්ස් පුවත්පත වාර්තා කරනවා.
සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා පසුගිය සිකුරාදා (03) සියළුම පළාත් සෞඛ්‍ය සේවා අධ්‍යක්ෂවරුන්, කලාපීය සෞඛ්‍ය සේවා අධ්‍යක්ෂවරුන් සහ සෞඛ්‍ය වෛද්‍ය නිලධාරීන් වෙත මෙම තීරණය දැනුම් දී තිබෙනවා.
ඒ අනුව අනිවාර්ය නිරෝධායන කාලය සම්පූර්ණ කළ හෝ එන්නත් ලබා ගත් සංචාරකයින්ට සෞඛ්‍ය මාර්ගෝපදේශ යටතේ සහ උපරිම ධාරිතාව යටතේ අවන්හල්, බාර්, කෝපි හල් සහ පොදු පහසුකම් සහිත හෝටල්වල පහසුකම් භුක්ති විඳිය හැකියි.
සුරාබදු කොමසාරිස් ජනරාල්වරයාගේ අනුමැතිය ඇතිව මත්පැන් බලපත්‍ර ඇති සංචාරක ආයතනවලට සංචාරකයන් හට මත්පැන් පිරිනැමීමටද මෙමගින් අවසර ලබාදී ඇති බව සන්ඩේ ටයිම්ස් වාර්තා කරනවා.
සෞඛ්‍ය සේවා අධ්‍යක්ෂ ජනරාල්වරයා සිය චක්‍ර ලේඛනයෙහි සදහන් කරන්නේ අත්‍යාවශ්‍ය ආර්ථික අංශයක් වශයෙන් සංචාරක කටයුතු සංචරණ සීමා කිරීම් යටතේ උවද අඛණ්ඩව සිදු කරන බවයි.
