ගලධාරී හෝටලය වෙත මේ වන විට සමාජ මාධ්‍ය ක්‍රියාකාරීන්ගෙන් දැවැන්ත ප්‍රහාරයක් එල්ලවී තිබෙනවා.
ඒ කොළඹ ගාලු මුවදොර ක්‍රියාත්මක කෙරෙන ‘ගෝඨාගෝගම’ ඉවත්කිරීම වෙනුවෙන් කොළඹ ප්‍රධාන මහේස්ත්‍රාත් අධිකරණය වෙත ගොනු කර ඇති නඩුවේ පොලිසියේ සහයට ප්‍රකාශ ලබා දී ඇති පිරිස අතර එම හෝටලයේ ලොබි කළමණාකරු වන සනත් කුමාර නම් පුද්ගලයාද සිටින බැවින්.
ගලධාරී හෝටලයේ අනුදැනුම ඇතිව නඩුව වෙනුවෙන් මෙම පුද්ගලයා සාක්ෂි ලබාදී මෙම ජනතා අරගල භූමිය එම ස්ථානයෙන් ඉවත්කිරීමට ඔවුන් කටයුතු කරමින් පවතිනවා.
මෙම අශෝභන ක්‍රියාවට විරෝධය පා සමාජ මාධ්‍ය ක්‍රියාකාරීන් ගලධාරී හෝටලයේ නිල ෆේස්බුක් පිටුවට ගොස් එම හෝටලය සඳහා අයහපත් ප්‍රතිචාර (Bad Review) ලබාදී තිබෙනවා.
ඒ අනුව ඒ වන විට තරු 5 ක ඉතා හොඳ ප්‍රතිචාර තිබූ එම සමාජ මාධ්‍ය පිටුව තරු 1 දක්වා වේගයෙන් පහළ බැසීම හේතුවෙන් ගලධාරී හෝටලයේ පාලනාධිකාරිය සිය නිල ෆේස්බුක් පිටුව වෙත ප්‍රතිචාර (Review) දැක්වීමේ පහසුකම මේ වන විට අත්හිටුවීමට කටයුතු කර තිබෙනවා.
කෙසේවෙතත් සමාජ මාධ්‍ය ක්‍රියාකාරීන් මේ වන විට Google Review හී ද ගලධාරී හෝටලය වෙත අයහපත් ප්‍රතිචාර දක්වමින් තිබෙනවා.
මෙය දේශීය වශයෙන් මෙන්ම අන්තර්ජාතික වශයෙන්ද ගලධාරී හෝටලයේ කීර්ති නාමයට දැවැන්ත කැළලක් වී තිබීම විශේෂත්වයක්.
මීට අමතරව කොළඹ කොටුවේ පිහිටි ඉපැරණි ලන්සේදි රෝහලේ (Dutch Hospital) හී පිහිටි Tap House නම් සුරාසැලේ මෙහෙයුම් කළමණාකරු වන ගයාන් සන්තුෂ් කුරුප්පු ආරච්චි නම් පුද්ගලයාද අදාළ නඩුව වෙනුවෙන් පොලීසියේ සහයට ඉදිරිපත්වී තිබෙනවා.
මේ හේතුවෙන් එම ආයතනයටද සමාජ මාධ්‍ය ක්‍රියාකාරීන්ගෙන් විශාල විරෝධයක් මේ වන විටත් එල්ලවෙමින් පවතිනවා.
