මිල්කෝ ආයතනයේ වත්මන් සභාපති ලසන්ත වික්‍රමසිංහ මහතා එම ධුරයෙන් ඉවත් කර ඇති බවට මාධ්‍ය වාර්තා රැසක් අද (19) අනාවරණ කර තිබූ නමුත් නව සභාපතිවරයෙකු පත්කර ඇතැයි තමන්ද දැනගත්තේ මාධ්‍ය හරහා බවයි අද පෙරවරුවේ මාධ්‍ය හමුවක් කැඳවූ මිල්කෝ සභාපති ලසන්ත වික්‍රමසිංහ මහතා සඳහන් කළේ.
ඒ සම්බන්ධයෙන් විමසීමට තමන් විෂයභාර අමාත්‍යවරයා ඇමතීමට උත්සාහ කළද එයද ව්‍යර්ථ වූ බවයි සභාපතිවරයා සඳහන් පවසන්නේ.
එහිදී වැඩිදුරටත් අදහස් දැක්වූ ලසන්ත වික්‍රමසිංහ මහතා,
“ඒ සම්බන්ධයෙන් මට කිසිම දැනුම්දීමක් කරලා නැහැ. මමත් දැනගත්තේ මාධ්‍යයෙන්. නමුත් මටත් ආරංචි වුණා රේණුක පෙරේරා මහතාට ලිපියක් නිකුත්කරලා තියෙනවා කියලා. කෙසේනමුත් එතුමත් අපේ හිතවතෙක්. එතුමා මෙතනට වැඩ භාරගන්න තුරු ඒ රාජකාරී ධුරයේ ඉදිරියට කරගෙන යනවා. ඉතින් සතුටුවෙනවා අපි මිල්කෝ සමාගම තුළ ජනාධිපතිතුමා භාරදුන් වගකීම පසුගිය අවුරුදු දෙක තුළ නොපිරිහෙලා ඉටුකරන්න අපිට හැකියාව ලැබුණා. හැමෝම ලේසි ඒවා ඉල්ලනවා අමාරු එකක් අරගෙන කරන්න කියන එක තමයි අපිට අභියෝගය භාර දුන්නේ. අපි ඒ අභියෝගය භාරගෙන වසර දෙකක් තුළ වැහෙන්න ගිය ආයතනය ලාභ ලබන ආයතනයක් බවට පත්කරලා පසුගිය අවුරුද්දේත් මිලියන 400ක ලාභ ලබන ආයතනයක් බවට පත්වුණා. ඊට කලින් අවුරුද්දෙත් මිලියන 400ක ලාභ යක් ලැබුවා.”
මාධ්‍යවේදියා –
“දේශපාලනික වශයෙන් තියෙන ප්‍රශ්නයක් නිසාද ඔබතුමා ඉවත්කරලා තියෙන්නේ ?”
සභාපතිවරයා –
“ඒක ඉතින් මගෙන් නෙමෙයි අහන්න ඕනේ අයින්කරපු අයගෙන් ඒ අහන් ඕනේ. මම හොයලා බලපු විදිහට හැමෝම දන්නේ නැහැ කියන එක තමයි කියන්නේ. හැබැයි ලියුම ගිහිල්ලා තියෙනවා.”
මාධ්‍යවේදියා –
“ජනාධිපතිතුමා විසින්ද ? “
සභාපතිවරයා –
“ඒක මම දන්නෙ නැහැ. එහෙම මට තාම කිසිකෙනෙක් කථා කරලා නැහැ. මහින්දානන්ද ඇමතිතුමා මට කිව්වේ ජනාධිපතිතුමා දන්නෙ නැහැ කියන කාරණය.”
