නව සෞඛ්‍ය අමාත්‍ය කෙහෙළිය රඹුක්වැල්ල මහතාගේ පුත් රමිත් රඹුක්වැල්ල හට සෞඛ්‍ය අමාත්‍යංශයේ තනතුරක් හිමිව තිබෙනවා.
ඒ අනුව, සෞඛ්‍ය අමාත්‍යවරයාගේ පුද්ගලික ලේකම්වරයා ලෙස ඔහු පසුගියදා වැඩ භාරගත්තා.
කෙසේ නමුත්, රමිත් රඹුක්වැල්ලගේ පසුගිය ක්‍රියාකලාපය හේතුවෙන් මෙම පත්වීම සම්බන්ධව සමාජයෙන් විවිධ විරෝධතා මතුවෙමින් පවතිනවා.
2013 වසරේ ගුවන් යානයකදී බීමත්ව හැසිරුණු බවට රමිත් රඹුක්වැල්ලට චෝදනා එල්ල විය.
රමිත රඹුක්වැල්ල ශ්‍රී ලංකා ක්‍රිකට් ‘ඒ’ කණ්ඩායම නියෝජනය කළ සමයේ බටහිර ඉන්දීය කොදෙව් සංචාරය නිමවා ශ්‍රී ලංකාවට පැමිණෙමින් සිටියදී ගුවන් යානයේ දොර විවෘත කිරීමට උත්සහ කිරීම සමාජයේ මහත් ආන්දෝලනයට තුඩු දුන්නා. පසුව ඔහු විනය පරීක්‍ෂණයකටද ලක්වූ අතර ඒ සම්බන්ධයෙන් සමාවද ඉල්ලා සිටියා.
එම අවස්ථාවේදී සිහිනෙන් ඇවිදිමින් සිටි තමන් වැරදීමකින් වැසිකිළි දොර යයි සිතා ගුවන් යානා දොර විවෘත කිරීමට උත්සාහ දැරූ බව රඹුක්වැල්ල පැවසුවද ඔහු බීමතින් සිටි විලාසයක් පෙනුණු බවත් බ්‍රිටිෂ් එයාර්වේස් ගුවන් සේවකයන් පැමිණ සන්සුන් කරනතුරු රමිත් රඹුක්වැල්ල විනාඩි දෙකක් පමණ දොර අගුල තදින් අදිමින් සිටි බවත් සිද්ධිය සියැසින් දුටුවන් පවසා ඇති බව BBC පුවත් සේවය වාර්තා කරන ලදි.
එමෙන්ම, 2018 මාර්තු මස 09වනදා රමිත රඹුක්වැල්ල අත්අඩංගුවට පත්වූයේ බීමත්ව රිය අනතුරක් කිරීම ඇතුළු චෝදනා කිහිපයක් සම්බන්ධයෙන්.
පසුව අධිකරනයේදී නොසැලකිළිමත් ලෙස රිය පැදවීම සහ රිය අනතුරක් වැළැක්වීමට පියවර නොගැනීම යන චෝදනා 2කට ඔහු වරද පිළිගත් නමුත් බීමත්ව රිය පැදවීම යන චෝදනාවට වරද පිලිගත්තේ නෑ.
කෙසේ නමුත් අධිකරණය නියෝග කළේ රමිත් රඹුක්වැල්ල නුගේගොඩ ජාතික ප්‍රවාහන වෛද්‍ය ආයතනය වෙත යොමුකර කායික හා මානසික සෞඛ්‍ය තත්ත්වය පිළිබඳ වාර්තාවක් අධීකරණයට ඉදිරිපත් කරන ලෙසයි.
තවද අනතුරෙන් තුවාල වූ සරසවි සිසුන් දෙදෙනා රඹුක්වැල්ලගෙන් වන්දි මුදලක් අපේක්ෂා නොකරන බවට අධ්කරණයේදී පැවසූ නිසා ම සිසුන් දෙදෙනාව අදාල නඩු කටයුත්තෙන් මුදා හැරීමට අතිරේක මහේස්ත්‍රාත්වරයා නියෝග කළා
කෙසේ වෙතත්, මේ සම්බන්ධයෙන් අදහස් දක්වමින් කෙහෙළිය රඹුක්වැල්ල මහතා ප්‍රකාශ කර සිටියේ එය ලෝකයේ සිදුවූ පළමු රිය අනතුර නොවන බවයි.
