ශ්‍රී ලංකා නිදහස් පක්ෂයේ 71 වන සංවත්සරය අදට යෙදී තිබෙනවා. 1951 වසරේ සැප්තැම්බර් දෙවැනි දා කොළඹ නගර ශාලාවේදී ශ්‍රී ලංකා නිදහස් පක්ෂය ඇරඹෙන්නේ දිවංගත අග්‍රාමාත්‍ය එස්.ඩබ්.ආර්.ඩී. බණ්ඩාරනායකයන්ගේ නායකත්වයෙන්.
සංවත්සර සම්මේලනය අද (02) පස්වරු 1.30ට මහරගම ජාතික තරුණ සේවා සභා පරිශ්‍රයේදී පැවැත්වීමට සැළසුම් කර තිබෙනවා.
අපේකමට පණ දෙමු – අභියෝගය අතට ගමු – යුග මෙහෙවරට උර දෙමු යන්න මෙවර එහි තේමාව වී තිබෙනවා.
ශ්‍රී ලංකා නිදහස් පක්ෂ සභාපති හිටපු ජනාධිපති මෛත්‍රීපාල සිරිසේනගේ ප්‍රධානත්වයෙන් පැවැත්වෙන මෙම සංවත්සර සම්මේලනයට සමගාමීව අද එම පක්ෂයේ ව්‍යවස්ථාව සංශෝධනය කිරීමද සිදු වනවා.
ඒ සදහා අද දිනයේ නිදහස් පක්ෂයේ සමස්ත ලංකා කාරක සභාවද කැදවා ඇති අතර ඊයේ මධ්‍යම කාරක සභාවේදී අනුමත කරගත් පක්ෂ ව්‍යවස්ථා සංශෝධනයට අදාළ යෝජනා එම කාරක සභාවේ අනුමැතිය සදහා ඉදිරිපත් කිරීමට නියමිතයි.
පක්ෂ ව්‍යවස්ථාව සංශෝධනය කිරීම පිටුපස පක්ෂ සභාපතිවරයාගේ බලතල වැඩිකර ගැනීමේ අරමුණක් ක්‍රියාත්මක බවට මත පළ වුණා.
ඊයේ (01) මධ්‍යම කාරක සභාවට ඉදිරිපත් කළ යෝජිත සංශෝධන අතර පක්ෂය නියෝජනය කරමින් විධායක ජනාධිපතිවරයකු නො සිටින අවස්ථාවක පක්ෂ සභාපතිවරයා පත් කර ගැනීමේ බලය පවතින විධායක සභාවේ සංයුතියද සංශෝධනය කිරීමද ඇතුළත්ව තිබූ බව සදහන්.
ඒ අනුව විධායක සභාවේ දැනට 25ක්ව පවතින සංයුතිය 35ක් දක්වා ඉහළ නැංවීමට ද මධ්‍යම කාරක සභාවේ අනුමැතිය හිමිවුණා.
එමෙන් ම දැනට ජ්‍යෙෂ්ඨ උප සභාපතිවරුන් 4ක් ලෙස පවතින සංයුතිය 7ක් දක්වා වැඩි කිරීමටත්, උප සභාපතිවරු 10ක් ලෙස ඇති සංයුතිය 14ක් දක්වා වැඩි කිරීමටත් යෝජනා කර ඇති බව වාර්තා වුණා.
එමෙන් ම නව සංශෝධන හරහා ජ්‍යෙෂ්ඨ උප සභාපතිවරු, උප සභාපතිවරු, ජාතික සංවිධායක හා භාණ්ඩාගාරික ඇතුළු තනතුරු ඉවත් කිරීමේ බලය සභාපතිවරයා වෙත පවරා ගැනීමටද යෝජනා වී තිබූ බව සදහන්.
කෙසේ වෙතත් ව්‍යවස්ථා සංශෝධනයට අදාළ ඇතැම් යෝජනා සංශෝධනය කිරීමේ එකගත්වය මත ඊයේ මධ්‍යම කාරක සභාවේදී පක්ෂ ව්‍යවස්ථාව සංශෝධනයට ඒකමතික අනුමැතිය හිමි වී තිබුණා.
