රසායනික පොහොර සහ වල්නාශකවලට හුරුවූ ගොවීන් කාබනික වගාවට යොමු කිරීම අභියෝගාත්මක කර්තව්‍යයක් බව ජනාධිපති ගෝඨාභය රාජපක්ෂ මහතා පවසනවා.
ඒ, යල කන්නය සඳහා කාබනික පොහොර බෙදාහැරීමට ඇති සූදානම සම්බන්ධයෙන් අද (15) පෙරවරුවේ ජනාධිපති කාර්යාලයේදී පැවති හමුව අමතමින්.
එහෙත් සියලුම මට්ටමේ නිලධාරීන් දැඩි උනන්දුවකින්, විශ්වාසයකින් හා කැපවීමෙන් වැඩ කර සාර්ථක ප්‍රතිඵල පෙන්විය හැකි බවයි ජනාධිපතිවරයා පෙන්වා දෙන්නේ.
ගොවීන් නිසි ලෙස දැනුවත් කිරීම, නිසි වේලාවට ප්‍රමිතියෙන් ඉහළ පොහොර ලබාදීම සිදුවිය යුතු බවත් ජනාධිපතිවරයා අවධාරණය කරනවා.
කාබනික පොහොර නිෂ්පාදනයට සම්බන්ධ වී සිටින සියලු නිෂ්පාදන ආයතන දීර්ඝ කාලයක් පර්යේෂණ සිදුකර වගා කටයුතු සඳහා යොමුව සාර්ථක ප්‍රතිඵල අත්කරගෙන සිටින බවත් ඔවුන්ගේ දැනුම හා ඉහළ ප්‍රමිතියෙන් යුත් නිෂ්පාදන ගොවි ජනතාව අතට පත් කිරීමෙන් අපේක්ෂිත ප්‍රතිඵල ලබාගත හැකි බව තමාට විශ්වාස යැයිද ජනාධිපතිවරයා පවසනවා.
මහ කන්නයේ දී කාබනික පොහොර නිවැරදි ලෙස භාවිත කළ ගොවීන් ඉහළ අස්වැන්නක් ගෙන තිබෙන බවයි සාකච්ඡාව සඳහා එක්ව සිටි දිස්ත්‍රික් ලේකම්වරුන් ජනාධිපතිවරයා හමුවේ සඳහන් කළේ.
ඒ අනුව, ඊට යොමු නොවූ ගොවීන් ද නිසි ලෙස දැනුවත් කර, සිදුවූ අඩුපාඩු මඟහරවා ගැනීමෙන් හරිත කෘෂිකර්මාන්තයක් සඳහා රජය ගෙනයන වැඩපිළිවෙල ජයගත හැකි බව දිස්ත්‍රික් ලේකම්වරු වැඩිදුරටත් පෙන්වා දී තිබෙනවා.
මහ කන්නයේ දී ලත් අත්දැකීම් පාදක කරගනිමින් දිස්ත්‍රික් මට්ටමින් කාබනික පොහොර නිෂ්පාදකයින් 48 දෙනෙකු තෝරාගෙන පොහොර බෙදාහැරීමේ කටයුතු සැලසුම් කර ඇතැයි ද රාජ්‍ය අමාත්‍ය ශෂීන්ද්‍ර රාජපක්ෂ මහතා එහිදී පෙන්වාදී තිබෙනවා.
