මහර බන්ධනාගාරයේ රැඳවියන් නිදහස් කිරීමේදී අනාරක්ෂිත ක්‍රමයක් අනුගමනය කිරීමෙන් කොවිඩ් රෝග ව්‍යාප්තියක අවදානමක් මතුව ඇතැයි එහි අභ්‍යන්තර ආරංචි මාර්ග සඳහන් කරයි.
දඩ මුදල් ගෙවා ගත නොහැකිව දඬුවම් ලැබූවන් හා දඬුවම් කාලය දීර්ඝ වූ රැඳවියන් නිදහස් කරගැනීමේදී මෙම තත්ත්වය උග්‍ර වී ඇතැයි එහි ප්‍රකාශකයෙක් ‘නිව්ස් 19’ ට පැවැසීය.
නියමිත දඩ මුදල් ගෙවීමෙන් පසු රැඳවියන් නිදහස් කිරීමට පෙර පී.සී.ආර් පරීක්ෂණයකට යොමුකර ඔවුන් බන්ධනාගාරයේ බාහිර වාට්ටුවකට ඇතුලත් කරන්නේ යැයි ද ප්‍රතිඵල අනුව ආසාදිත බව තහවුරු වූවන් පොළොන්නරුව ගල්ලෑල්ල නිරෝධායන මධ්‍යස්ථානයට යොමුකරන්නේ යැයි ද කියති.
එහෙත් මෙසේ ආසාදිතවූවන් නිරෝධායන මධ්‍යස්ථානයකට යොමු කළ ද ඔවුන් සමග සිටි සෙසු පිරිසට නිවෙස්වලට යන්නට ඉඩ ලැබෙන්නේ යැයි ද වාර්තා වේ.
එසේ නිදහස ලබන රැඳවියන් ගැන අදාළ සෞඛ්‍ය වෛද්‍ය බලධාරින්ට වාර්තා කිරීම සිදුකෙරෙන නමුත් ඔවුන්ගෙන් බාහිර සමාජයට කොවිඞ් ආසාදනය වීමේ අවදානම ගැන කිසිදු සැලකිල්ලක් යොමු කර නැතැයි වාර්තා වේ.
මෙම තත්ත්වය සම්බන්ධයෙන් නිල නොවන අයුරින් රජයේ වෛද්‍ය නිලධාරින්ගේ සංගමයට පැමිණිලි කර ඇතැයි ද වාර්තා වේ.
