කොවිඩ් 19 වෛරසය සඳහා දේශීය ඔසුවක් සොයා ගත් බව පවසන ඩී.එම්. ධම්මික බණ්ඩාර මහතාගේ කොරෝනා පැණිය ලබා ගැනීම සඳහා 5000 කට ආසන්න පිරිසක් කෑගල්ල, හෙට්ටිමුල්ල, උඩුමාගම පිහිටි ඔහුගේ නිවස ඉදිරිපිටට පැමිණ ඇති බව කෑගල්ල පොලිසියේ නිලධාරියෙකු පැවසීය.
කොවිඩ් සුව කරනවා යැයි පවසන අදාල ඖෂධය ලබා ගැනීම සඳහා දෙසැම්බර් 08 දින අලුයම සිට මෙම පිරිස පැමිණෙමින් සිටින බවත් පිරිස් මේ ආකාරයෙන් එක්රැස් වීම නිසා ප්‍රදේශයේ විශාල තදබදයක් ඇති වී ඇති බවත් එම නිලධාරියා පැවසීය.
කෙසේ වෙතත් එම තදබදය පාලනය කිරීමට කෑගල්ල පොලිස් කොට්ඨාශයේ පොලිස් නිලධාරීන් 200කට අධික පිරිසක් යොදවා ඇති බවත් අදාල පැණිය ලබා ගැනීම සඳහා කොවිඩ් ආසාදිතයන්ද පැමිණ ඇති බවට ලැබුණු තොරතුරු මත ප්‍රදේශයේ මහජන සෞඛ්‍ය පරීක්ෂකවරුන් ද එම ස්ථානයට කැඳවා ඇති බවත් ඒ මහතා පැවසීය.
මේ ආකාරයෙන් කොවිඩ් ආසාදිතයන්ද මෙම පිරිස් අතරට පැමිණිම නිසා විශාල අවධානමක් උද්ගත වී ඇති බවත් ඔහු පැවසීය.
කෙසේ වෙතත් අප මේ පිළිබඳව කළ විමසුමකදී කෑගල්ල ප්‍රදේශයේ සෞඛ්‍ය නිලධාරීන් කිහිපදෙනෙක්ම පැවසූවේ පරීක්ෂණ මට්ටමේ ඇති අදාල පැණිය ලබා ගැනීමට පැමිණෙන පිරිස් අතර කොවිඩ් වෛරසය ව්‍යාප්ත වීමේ විශාල ඉඩකඩක් ඇති බවත් බොහෝ පිරිස් නිරෝධායන නීතී කඩ කරමින් මුඛ ආවාරණ පවා නොපැළඳගෙන සිටින බවය. මේ හරහා කොරෝනා පැණි පොකුරක් බිහිවීමට ඉඩ ඇති බවත් අදාල සෞඛ්‍ය නිලධාරීන් පවසයි.
