සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා විසින් රුපියල් මිලියන 500 ක වන්දි මුදලක් ලබාදෙන ලෙස ඉල්ලමින් කෘෂිකර්ම අමාත්ය මහින්දානන්ද අළුත්ගමගේ මහතා වෙත එන්තරවාසියක් යවා තිබෙනවා.
ඒ, ගොවි විරෝධතා සම්බන්ධයෙන් පසුගියදා සිදුකළ ප්රකාශයක් හේතුවෙන් සිය කීර්තිනාමයට හානි සිදුව ඇති බව පවසමින්.
නීතිඥ සුනිල් වටගල මහතා හරහා යවා ඇති මෙම එන්තරවාසියෙන් නාමල් කරුණාරත්න මහතා දැනුම් දෙන්නේ දින 14 ක් ඇතුළත වන්දි මුදල ගෙවීමට කටයුතු කරන ලෙසයි. එසේ නොමැති වුවහොත් නීතිමය පියවර ගන්නා බවද දන්වා තිබෙනවා.
මහ කන්නය සඳහා පොහොර ඉල්ලා ගොවීන් පාරට බැස්සවීම සිදු කරන්නේ ජනතා විමුක්ති පෙරමුණ බවත් ඒ වෙනුවෙන් නාමල් කරුණාරත්න මහතා ඇතුළු ජවිපෙන නායකයන්, පොහොර සමාගම්වලින් මුදල් ලබාගෙන ඇති බවත් මහින්දානන්ද අළුත්ගමගේ මහතා පවසා තිබිණි.
එම ප්රකාශය පසුගිය 17 වැනිදා මාධ්ය මගින් වාර්තා කර තිබිණි.