ජනතාවාදී ආණ්ඩුවක් එනතුරු එක ඩොලර් එකක් එවන්නෑ – විදෙස්ගත ශ්‍රී ලාංකිකයෝ
වත්මන් පාලනය අවසන් කොට දූෂණයෙන් තොර ජනතාවාදී පාලනයක් රට තුළ ඇති වන තෙක් එකම ඩොලරයක් හෝ රටට නොඑවීමට තමන් තීරණය කළ බව ‘වෙනසක් සඳහා විදෙස් ගත ශ්‍රමිකයෝ’ සංවිධානය පවසනවා.
ඔස්ට්‍රේලියාව, ඉතාලිය, ඇමරිකාව ඇතුළු රටවල් රැසක ජීවත්වන විදෙස් ගත ශ්‍රී ලාංකිකයන් එකතුවී ‘වෙනසක් සඳහා විදෙස්ගත ශ්‍රමිකයෝ’ සංවිධානය පිහිටුවා ගෙන තිබෙනවා.
එම සංවිධානයේ කැඳවුම්කාර මණ්ඩලයේ සාමාජික මනෝජ් ගමගේ මහතා පවසන්නේ ජනාධිපති ගෝඨාභය රාජපක්ෂ මහතා ජාතිය අමතමින් රටේ පවතින අර්බුදයට විසඳුම් යෝජනා කරනවා වෙනුවට අන් අයට වරද පටවන්නට උත්සහ කිරීම පිළිබඳව තම සංගමය විරෝධය පලකරන බවයි.
මුළු මහත් සමාජයක් ආර්ථික අර්බුදයක ගිලී ජන ජීවිතය අඩාලවී ඇති මොහොතක ජනාධිපතිවරයෙකු මීට වඩා වගකීම් සහගත ලෙස ක්‍රියාකල යුතු බව තම සංගමයේ විශ්වාසය බව මනෝජ් ගමගේ මහතා පෙන්වා දෙනවා.
