ජනතාවගේ බලාපොරොත්තු රැසක් සමගින් බලයට පත්වූ පකිස්ථාන අග්‍රාමාත්‍ය ඉම්රාන් ඛාන් බලයට පත්වී කෙටි කලක් තුළ පකිස්ථානය ඇඳ දැමූ ආර්ථික අගාධය හේතුවෙන් ඔහුට විරුද්ධව රැගෙන ආ විශ්වාසභංගය පරාජයට පත්ව තිබෙනවා.
ඒ අනුව පකිස්ථාන දේශපාලන ඉතිහාසය තුළ විශ්වාසභංග යෝජනාවකින් පරාජයට පත්ව සිය අසුන අහිමි වූ පළමු අග්‍රාමාත්‍යවරයා බවට එරට අග්‍රාමාත්‍ය ඉම්රාන් ඛාන් ඉතිහාසයට එක් වනවා.
මේ වන විට පකිස්ථානය තුළ ඉම්රාන්ට කෙතරම් විරෝධයක් ඇතිව තිබෙන්නේද යන්න ඊයේ (09) පාර්ලිමේන්තුවේ ජාතික සභාව තුළ ගැණුනු ඡන්ද විමසීම හොඳම සාක්ෂියක්.
එම ඡන්ද විමසීමේදී ඉම්රාන් ඛාන්ට එරෙහිව ගෙනආ විශ්වාසභංග යෝජනාව වැඩි ඡන්දයෙන් සම්මත වුණා.
ඒ අනුව ඡන්ද 174 ක් ඉම්රාන්ට එරෙහිව ප්‍රකාශයට පත්ව තිබුණා.
ඉම්රාන් ඛාන්ට මෙතරම් විරෝධයක් එල්ලවූයේ ඔහුගේ පාලනය තුළ පකිස්ථාන ආර්ථිකය සම්පූර්ණයෙන්ම විනාශ කර දැමීම හේතුවෙන් බවයි විදෙස් මාධ්‍ය වාර්තා කරන්නේ.
චීනයෙන් අසීමිතව ණය ලබාගෙන ආර්ථිකය දැඩි පීඩනයකට ලක්කිරීම, රට තුළ පෝලිම් යුගයක් ඇතිකිරීම, අන්තවාදීන්ට මෙන්ම ත්‍රස්තවාදීන්ටද රජය සහය දැක්වීම වැනි චෝදනා රැසක් ඉම්රාන් ඛාන්ට එරෙහිව පැවතියා.
මේ හේතුවෙන් පසුගිය කාලය පුරාවටම ඉම්රාන් ඛාන්ගේ පාලනය අවසන් කළ යුතු බවට වන විරෝධතා මාලාවක් පකිස්ථානය තුළ ක්‍රියාත්මක වුණා.
