අධ්‍යාපන රාජ්‍ය ඇමති පියල් නිශාන්ත කළුතර දිස්ත්‍රික්කයේ පාසැල් සිසු සිසුවියන් ඒකරාශි කොට වියළි ආහාර බෙදාදීමේ වැඩසටහන් කිහිපක් සිදු කර ඇති බව වාර්තා වේ.
පාසල් නොමැති කාලයේ දරුවන් ගෙන්වා ගෙන ඇත්තේ රජයෙන් පාසල් දරුවන්ට ලබාදෙන රුපියල් 1000 ක් වටිනා වියළි ආහාර පාර්සල ලබාදීමටය. එහි පළමු පියවර ලෙස කළුතර දිස්ත්‍රික්කයේ වරාපිටිය කනිෂ්ඨ විද්‍යාලයේදි නොවැම්බර් 11 දා වියළි ආහාර මළු ලබාදීම උත්සවාකාරයෙන් පැවත්වා ඇත. ඔහු එහිදි පවසා ඇත්තේ සෞභාග්‍යයේ දැක්ම ප්‍රතිපත්ති ප්‍රකාශය අනුව යමින් ආරම්භ කර පාසල් දරුවන්ට උදෑසන ආහාර වේල ලබාදීමේ වැඩසටහන යාවත්කාලීන කරමින් මෙම වියළි ආහාර බෙදාදීම කරන බවය.
එම ආකාරයෙන්ම මෙම සතිය පුරාම විවිධ පාසල්වල ළමුන් ඒකරාශි කරමින් අදාල පාර්සල් බෙදා දී ඇති අතර නොවැම්බර් 16 දින දී කළුතර දිස්ත්‍රික්කයේ පාසල් 9ක දරුවන් ඒකරාශි කරමින් උත්සව පවත්වා ඇත.
අප කළ විමසීමකදී ලංකා ගුරු සංගමයේ ලේකම් ජෝසෆ් ස්ටාලීන් මහතා පැවසූවේ රජයෙන් ලබා දෙන වියළි ආහාර පාර්සල් ලබා දෙනවා යැයි මෙසේ පිරිස් එක්රැස් කිරීම දරුවන්ට අවදානම් බැවින් මේ ක්‍රියාකලාපය වහාම නැවැත්විය යුතු බවය.
