සමගි ජන බලවේගය විසින් ඊයේ දින සංවිධානය කර තිබූ ‘ජන බලය කොළඹට’ විරෝධතාවයට සහභාගී වීමට පැමිණි තරුණයකු අත්අඩංගුවට ගෙන පහරදී මරා දමා ඇති බවට සමගි ජනබලවේගය අද (17) දින පාර්ලිමේන්තුවේදී චෝදනා කර සිටියා.
මේ වන විට ප්‍රදේශවාසීන් පොලිස් ස්ථානයට රැස්ව ඇති බවයි ඔවුන් පැවසුවේ.
කෙසේ නමුත් ඒ චෝදනාව සම්පූර්ණයෙන්ම අසත්‍යක් බව මහජන ආරක්ෂක අමාත්‍ය රියාර් අද්මිරාල් සරත් වීරසේකර මහතා පාර්ලිමේන්තුවේදී පවසා සිටියේ.
පනාමුරේ පදිංචි ඉන්දික ජයරත්න නැමැති මෙම පුද්ගලයා මත්ද්‍රව්‍යවලට තදින්ම ඇබ්බැහි වූවකු බවත් ඔහු නිතරම බිරිඳට සහ දරුවන්ට පහර දෙන බවට පැමිණිලි ලැබී තිබූ බවත් ඔහු පවසනවා.
තමාට පොල්ලකින් පහර දුන් බවට එම තැනැත්තාගේ දුව පසුගිය 12 වැනි දා පොලීසියට පැමිණිල්ලක් කර රෝහල්ගතවී සිටින බව පැවසූ වීරසේකර මහතා එදින සිට මේ තැනැත්තා අතුරුදන්ව සිට ඇතැයිද පෙන්වා දෙනවා.
සැඟවී සිටියදී පොලීසිය මොහු ඊයේ (16) රාත්‍රී 10 ට පමණ අත්අඩංගුවට ගත් බවත් ඊයේ අලුයම සිරමැදිරියේ ඇඳුමකින් ගෙල සිරකර ගෙන සියදිවි හානිකර ගැනීමට උත්සාහ දැරූ අවස්ථාවේදී පොලීසිය ඔහු රෝහල්ගත කිරීමට ගෙන යනවිට මියගොස් ඇති බවත් සරත් වීරසේකර මහතා ප්‍රකාශ කර සිටිනවා.
මොහු සහ පෙළපාළිය අතර කිසිදු සම්බන්ධයක් නැති බව පැවසූ මහජන ආරක්ෂක අමාත්‍යවරයා පොලිසියට එරෙහිව කරන මෙම චෝදනාව අමූලික අසත්‍යයක් බව අවධාරණය කර සිටිනවා.
