රුපියල් එක්කෝටි හැට හත්ලක්ෂයක් වැයකොට පොළොන්නරුව – මැදිරිගිරිය වටදාගෙය පුදබිම ආසන්නයේ ඉදිකළ ඇවිදින මංතීරුව මේ වන විට ගිලා බැස තිබෙනවා.
මේ සඳහා උතුරුමැද පළාත් සභාව විසින් මුදල් වෙන්කර තිබූ අතර මේ වන විට මෙම ව්‍යාපෘතිය සම්පූර්ණයෙන්ම සුදු අලියෙක් බවට පත්ව ඇති බවයි වාර්තා වන්නේ.
ඇවිදින මංතීරුව ආසන්නයේ ඇති පොකුණෙහි රොන්මඩ ඉවත්කර පිළිිසකර කිරීම සඳහා රුපියල් පනස් හයලක්ෂ දහසය දහසක (5,616,000) මුදලක්ද, ඉන්ටර්ලොක් ගල් අතුරා පොකුණ වටා ඇවිදින මංතීරුව ඉදිකිරීම සඳහා රුපියල් අසූහත් ලක්ෂ හතලිස් හත්දහස් හතලිස් දෙකක (8,747,042) මුදලක්ද වීදි ලාම්පු ඉදිකිරීම සඳහා රුපියල් විසිහතර ලක්ෂ තිස් දහසක (2,430,000) මුදලක්ද මේ සදහා වැයකර තිබෙනවා.
කෙසේ වෙතත් වසරක් ගතවීමටත් පෙර පොකුණෙහි පන් හා හම්බු වැනි ජලජ ශාක වලින් පිරී පවතින අතර ඇවිදින මංතීරුවද ස්ථාන කිහිපයකින්ම ගිලාබැස තිබෙනවා.
ව්‍යපෘතිය මගින් රොන්මඩ සියල්ල ඉවත්කිරීමට නියමිතව තිබුණද වැසි සමයේ වැඩ ආරම්භ කර තිබූ බැවින් කොන්ත්‍රාත් සමාගම එය නිසිපරිදි නොකෙරූ බවට ප්‍රදේශවාසීන් චෝදනා කරනවා.
මේ වන විට මෙම මංතීරුව වසාගෙන ඇති තණකොළ කෑමට නිතර දෙවේලේ ගවයින් මංතීරුව ඔස්සේ ගමන් කරනු දක්නට ලැබෙන බවද ප්‍රදේශවාසීන් පවසනවා.
කෙසේ වෙතත් මේ වන විට එම ව්‍යාපෘතිය හරහා මෙරට දුගී පළාත් සභාවලින් එකක් වන උතුරු මැද පළාත් සභාවේ කෝටි ගණනක මුදලක් කාබාසිනියා කර අවසානවී තිබෙනවා.
