ඉන්දු පැසිෆික් කලාපය තුළ චීනයේ වර්ධනය වන බිය ගැන්වීමේ හැසිරීම මධ්‍යයේ කලාපයේ පවතින තත්ත්වය වෙනස් කිරීමට හෝ ආතතීන් වැඩි කිරීමට උත්සාහ කරන ඕනෑම ඒකපාර්ශ්වික ක්‍රියාවකට තමන් දැඩි ලෙස විරුද්ධ වන බව , ඉන්දියාව, ඕස්ට්‍රේලියාව, ජපානය සහ එක්සත් ජනපදය සමන්විත ක්වාඩ් රටවල් කණ්ඩායම ප්‍රකාශ කර තිබේ.
77 වන එක්සත් ජාතීන්ගේ මහා මණ්ඩල සැසිවාරයට සමගාමීව එම රටවල විදේශ අමාත්‍යවරු නිව්යෝර්ක් නගරයේ දී රැස්වූයේ, නිදහස් හා විවෘත ඉන්දු පැසිෆික් කලාපයක් ඉදිරියට ගෙන යාම සඳහා සහය දැක්වීම සඳහා බහුපාර්ශ්වික සහයෝගීතාව ගැඹුරු කිරීම යන අරමුණු සහිතවයි.
මෙම රැස්වීමට ඕස්ට්‍රේලියාවේ විදේශ අමාත්‍ය ෆෙනී වොන්ග් , ඉන්දියාවේ විදේශ ඇමති එස් ජයශංකර්, ජපානයේ හයාශි යොශිමාසා සහ එක්සත් ජනපද රාජ්‍ය ලේකම් ඇන්තනි බ්ලින්කන් සහභාගී වී තිබේ.
ක්වාඩ් කණ්ඩායමෙහි දැක්ම වන්නේ නීති මත පදනම්ව නිදහස, නීතියේ ආධිපත්‍යය, ප්‍රජාතන්ත්‍රවාදී වටිනාකම්, ආරවුල් සාමකාමීව විසඳීම, ස්වෛරීභාවය සහ භෞමික අඛණ්ඩතාව යන මූලධර්මවලට ගරු කරන ඉන්දු පැසිෆික් කලාපයක් බව එක්සත් ජනපද රාජ්‍ය දෙපාර්තමේන්තුව විසින් නිකුත් කළ ඒකාබද්ධ නිවේදනයක සඳහන් වේ.
කලාපයේ පවතින තත්ත්වය වෙනස් කිරීමට හෝ ආතතීන් වැඩි කිරීමට උත්සාහ කරන ඕනෑම ඒකපාර්ශ්වික ක්‍රියාවකට ඔවුන් දැඩි ලෙස විරුද්ධ වෙන බව විදේශ අමාත්‍යවරු හතර දෙනා පැවසූ බව ද එහි දැක්වේ.
