ශ්‍රී ලංකාවට දැවැන්ත ජයක්

සංචාරක අයර්ලන්ත කණ්ඩායම සමග පැවති පළමු ටෙස්ට් තරගය තුන්වැනි දිනය නිමා වීමටත් පෙර ඉනිමකින් සහ ලකුණු 280කින් ජය ගැනීමට ශ්‍රී ලංකා කණ්ඩායම සමත් වුණා.

තරගයේ පළමුව පන්දුවට පහරදුන් ශ්‍රී ලංකා කණ්ඩායම කඩුලු 6ක් දැවී ලකුණු 591ක් ලබා සිටියදී ඉනිම අත්හිටවනු ලැබුවා.

ශ්‍රී ලංකාව වෙනුවෙන් දිමුත් කරුණාරත්න, කුසල් මෙන්ඩිස්, දිනේෂ් චන්දිමාල් සහ සදීර සමරවික්‍රම ශතක ලබා ගත්තා.

අයර්ලන්ත පළමු ඉනිම ලකුණු 143කට සීමා වුණා.

විශිෂ්ට පන්දු යැවීමක නිරත වූ ප්‍රභාත් ජයසූරිය ලකුණු 52කට කඩුලු 7ක් දවා ගත්තා.

ඒ අනුව ලකුණු 448ක් පිටුපසින් සිටිමින් දෙවැනි ඉනිම සඳහා පන්දුවට පහරදීමට අයර්ලන්ත කණ්ඩායම පිටියට පිවිසියා.

අයර්ලන්ත දෙවැනි ඉනිම ලකුණු 168කට සීමා කිරීමට ශ්‍රී ලංකා පන්දු බලඇණිය සමත් වුණා.

අද දිනය තුල අයර්ලන්ත කඩුලු 13ක් බිඳවැටීම කැපී පෙනුණා.

එහිදී රමේෂ් මෙන්ඩිස් ලකුණු 76කට කඩුලු 4ක් සහ ප්‍රභාත් ජයසූරිය ලකුණු 56කට කඩුලු 3ක් දවා ගත්තා.

රමේෂ් මෙන්ඩිස් මෙම තරගයේදී සිය ටෙස්ට් දිවියේ 50 වැනි කඩුල්ල දවා ගත් අතර අඩුම තරග සංඛ්‍යාවකදී (11) ටෙස්ට් කඩුලු 50ක් දවා ගත් ශ්‍ර්‍රී ලංකා පන්දු යවන්නාගේ වාර්තාව සම කිරීමට ඔහු සමත් වුණා.

තරගයේ වීරයා සම්මානය ලැබූ ප්‍රභාත් ජයසූරිය මෙම තරගයේදි කඩුලු 10ක් බිඳ හෙලුවා.

ඒ අනුව ටෙස්ට් තරගාවලිය 1 – 0ක් ලෙස පෙරමුණ ගැනීමට ශ්‍රී ලංකා කණ්ඩායම සමත් වුණා.

දෙරට අතර දෙවැනි ටෙස්ට් තරගය පැවැත්වෙන්නේ ද ගාල්ලේදී.