රෝහිත අබේගුණවර්ධන මන්ත්‍රීවරයා අගමැති කාර්යාලය අසලදී තමාට තර්ජනය කර පහර දීමට උත්සාහ දැරූ බව ඉලංකෙයි තමිල් අරසු කච්චි පක්ෂයේ පාර්ලිමේන්තු මන්ත්‍රී මඩකලපු දිස්ත්‍රික් මන්ත්‍රී ශානක්කියන් රාසමාණික්කම් මහතා පාර්ලිමේන්තුවේදී අද (07) පැවසුවා.
මෙම සිද්ධිය පාර්ලිමේන්තුවේ වරප්‍රසාද කමිටුව හමුවට ඉදිරිපත් කර අවශ්‍ය ක්‍රියාමාර්ග ගන්නා ලෙසද ඔහු මුලසුනෙන් ඉල්ලා සිටියා.
එහිදී වැඩිදුරටත් අදහස් දැක්වූ ඔහු,
“මට තර්ජනය කළා. තර්ජනය කරන්නේ කොහෙද? කරන්නේ අගමැති කාර්‍යාලයේ ඇතුළේ පාර්ලිමේන්තුවේ. අශෝක ප්‍රියන්ත ඇමතිතුමා නැත්තම් මේ රෝහිත අබේගුණවර්ධන කියන මන්ත්‍රීවරයා මට පහර දෙනවා. මීකට අගමැති කාර්‍යාලයේ ඉන්න නිලධාරීන් සාක්ෂියි. අශෝක ප්‍රියන්ත මන්ත්‍රීවරයා සාක්ෂියි.ජගත් ප්‍රියංකර මන්ත්‍රීවරයා සාක්ෂියි. මට කිව්වේ ඔබතුමා ආණ්ඩුවට විරුද්ධව කතා කරනවා නම් කොහොමද අගමැතිතුමා හම්බෙන්න එන්නේ. මේ අපේ අගමැතිතුමා. මං කිව්ව මේ රටේ අගමැතිතුමා කියලා…
ඉතින් මේකද මේ රටට සංහිදියාව පිළිබඳ දෙන පණිවිඩය. ගරු නියෝජ්‍ය කතානායකතුමනි මේක ඉතාමතම බැරෑරුම් සිදුවීමක්. පහර දීලා තිබ්බා නම් මට දැටටත් තර්ජනයක් තියෙනවා.මට ජීවිත තර්ජනයක් තියෙනවා.මෙතුමගේ කාර්‍යාලයෙන් මෙතුමව එළියට එක්කන් යනකොට පහර දෙන එකෙන් වළක්වලා අවසාන වශයෙන් කිව්වේ පස්සේ මෙතන ලිෆ්ට් එක ගාවට එනවා දැන් කියලා. එතකොට මේ පාර්ලිමේන්තුවෙන් එළියට යනකොට හරි එනකොට හරි මට මොනහරි හීරිල්ලක් හරි උනොත් මේ රෝහිත කියන පුද්ගලයා මේකට වගකියන්න ඕනේ.”
