සර්වෝදය නිර්මාතෘ හා සම්මානිත සභාපති ආචාර්ය ඒ. ටී ආරියරත්නයන්ගේ දේහය මහජන ගෞරවය පිණිස අද (17) සවස 6.00ට සර්වෝදය මූලස්ථානයේ දම්සක් මැදුරේ තැන්පත් කිරීමට නියමිතයි.
ඒ මහතාගේ දේහය අද (17) සිට ලබන සෙනසුරාදා (20) මධ්‍යහ්න දක්වා මහජන ගෞරවය පිණිස නො. 98, රාවතාවත්ත මොරටුව සර්වෝදය මූලස්ථානයේ දම්සක් මැදුරේ තැන්පත් කෙරෙනු ඇති.
අනතුරුව එදිනම සවස දේහය සර්වෝදය මූලස්ථානයේ සිට කොළඹ 7 නිදහස් චතුරශ්‍ර පරිශ්‍රයට රැගෙන යාමට නියමිතයි.
සර්වෝදය දැනුම් දී ඇත්තේ දේහය පිළිබද අවසන් කටයුතු, රාජ්‍ය ගෞරව සහිතව එදිනම සවස 4.00ට ආගමික වතාවත්වලින් අනතුරුව සිදුකිරීමට නියමිත බවටයි.
සර්වෝදය ශ්‍රමදාන ව්‍යාපාරයේ නිර්මාතෘ ආචාර්ය ඒ.ටී. ආරියරත්න මහතා ඊයේ (17) රාත්‍රියේ අභාවප්‍රාප්ත වුණා.
පෞද්ගලික රෝහලක ප්‍රතිකාර ලබමින් සිටියදී අභාවප්‍රාප්ත වුණු ඒ මහතා මියයන 93 වැනි වියේ පසු වුණා.
1931 වසරේදී උපත ලද ඒ මහතා ගාල්ල මහින්ද විද්‍යාලයේ ආදි ශිෂ්‍යයෙක්.
කොළඹ නාලන්දා විද්‍යාලයේ ගුරුවරයෙකු ලෙස කලක් කටයුතු කළ ආරියරත්න මහතා 1950 දශකයේදී එතුමාගේ සංකල්පයකට අනුව බිහි කළ සර්වෝදය ශ්‍රමදාන ව්‍යාපාරය දශක 06ක් පුරා මෙරට සරණක් අවැසි ජනතාවගේ උන්නතිය වෙනුවෙන් ක්‍රියාකාරීව කටයුතු කළ සංවිධානයක්.
ශ්‍රී ලංකාවේ විශාලතම රාජ්‍ය නොවන සංවිධානය වන සර්වෝදය ව්‍යාපාරය වෙනුවෙන් දෙස් විදෙස් ඇගයීම් රැසකට ද ආරියරත්න මහතා පාත්‍ර වුණා.
ශ්‍රී ලාංකිකයෙකු වෙනුවෙන් මෙරට පිරිනැමෙන ඉහළම සම්මානය වන ශ්‍රී ලංකාභිමාන්‍ය සම්මානය ඔහුට පිරිනැමෙන්නේ 2007 වසරේදීයි.
