චීන කාබනික පොහොර සඳහා වන ණයවර ලිපියට අදාල ගෙවීම් සිදු කිරීමට මහජන බැංකුවට නොහැකි වූයේ අධිකරණ වාරණ නියෝගයක් හේතුවෙන් බව එම බැංකුවේ ප්‍රධාන විධායක නිලධාරී සහ සාමාන්‍යාධිකාරී රංජිත් කොඩිතුවක්කු මහතා පවසනවා.
ඒ, යූටියුබ් නාලිකාවක් සමඟ සාකච්ඡාවකට එක් වෙමින්.
පොහොර සාම්පල පරීක්ෂාවට පෙරම, කොන්දේසි මාලාවකට අනුකූලව ණයවර ලිපිය විවෘත කළ බවත් චීන පොහොර නැව මෙරටට පැමිණියේ එය පදනම් කරගෙන බවත් ඔහු පවසනවා.
වාණිජ බලපත්‍රයක් ලබා නොදීම නැව මෙරටට පැමිණ ඇති බව අමාත්‍යවරයා පවසන නමුත් නැවක් පැමිණෙන්නේ ලියවිලි මත මිස භාණ්ඩ මත පදනම්ව නොවන බව ඔහු පෙන්වා දෙනවා.
භාණ්ඩ සඳහා වන වගකීම ඇත්තේ ආනයනකරු සහ අපනයනකරු සතුව බවත් මුදල් නොගෙවන බවට දේශපාලඥයන් පැවසුවද ණයවර ලිපි විවෘත කර මෙරටට පැමිණි නැවට ඩොලර් මිලියන 09ක මුදල ගෙවීමට මහජන බැංකුව බැඳී සිටින බවත් ඒ මහතා පවසනවා.
කෙසේ නමුත් චීන තානාපති කාර්‍යාලය විසින් මහජන බැංකුව අසාදු ලේඛනගත කිරීම හරහා බැංකුවේ අස්ථාවරත්වයක් හෝ මුදල් ගෙවීමේ නොහැකියාවක් පිළිඹිබු නොවන බවත් ඊට හේතු වූයේ අධිකරණ වාරණයක් බවත් ඔහු අවධාරණය කරනවා.
