අඛණ්ඩව වැඩිම එක්දින තරග සංඛ්‍යාවක් ජයගත් කණ්ඩායම් අතර දෙවැනි ස්ථානයට පත්වීමට එක් තරග ජයග්‍රහණයක් පසුපසින් සිටින ශ්‍රී ලංකා කණ්ඩායම ආසියානු කුසලානයේ සුපිරි සිව්දෙනාගේ වටය අරඹමින් බංග්ලාදේශයට එරෙහිව අද(09) තරග වදිනවා.
2003 වසරේ තරග 21ක් ජයගත් ඕස්ට්‍රේලියානුවන් පළමු ස්ථානයේ පසුවනවා.
පකිස්ථානය (2007-08 ජයග්‍රහණ 12) සහ දකුණු අප්‍රිකාව (2005 දී සහ 2016/17 දී ජයග්‍රහණ 12 ක් ලෙස දෙවරක්) සමඟ ශ්‍රී ලංකාව මේ වන විට දෙවැනි ස්ථානයේ සම තත්ත්වයේ සිටිනවා.
තරඟාවලිය ආරම්භයේදීම ශ්‍රී ලංකාව අතින් පරාජය වූ බංග්ලාදේශය, ඇෆ්ගනිස්තානය හමුවේ දැවැන්ත ජයග්‍රහණයක් ලබා ගත් නමුත් නමුත් සුපිරි සිව්දෙනාගේ වටයේ දී පාකිස්තානය හමුවේ යළි පරාජය වුණා.
සමස්තයක් ලෙස ශ්‍රී ලංකා මුල් පෙළ මේ වන විට ශක්තිමත් නමුත් මැද පෙළ සම්බන්ධයෙන් බරපතල අර්බුදයක් තිබෙන්නේ නායක දසුන් ශානක සහ ධනංජය ද සිල්වා පිතිකරුවන් ලෙස අසාර්ථක වීම හේතුවෙනි.
බංග්ලාදේශය ඔවුන්ගේ කණ්ඩායම වෙනස් නොකරනු ඇති නමුත් ලිටන් දාස් මොහොමඩ් නයිම් සමඟ ඉනිම ආරම්භ කරමින පිතිකරණ අනුපිලිවෙළේ වෙනසක් සිදු කරනු ඇතැයි අපේක්ෂා කළ හැකියි.
බංග්ලාදේශය (විය හැකි) : 1 මොහොමඩ් නයිම්, 2 ලිටන් දාස්, 3 අෆිෆ් හොසේන්, 4 ෂකීබ් අල් හසන් (නායක), 5 තව්හිද් හ්රිඩෝයි, 6 මුෂ්ෆිකර් රහීම් (කඩුලු රකින්නා), 7 ෂමිම් හොසේන්, 8 මෙහිදි හසන් මිරාස්, 9 ටස්කින් අහමඩ්, 10 ෂෝරීෆුල් ඉස්ලාම්, 11 හසන් මහමුද්
ශ්‍රී ලංකාව මූලික වටයේ අවසන් තරගයේදී ක්‍රීඩා කළ 11 දෙනා සමගම මෙම තරගය ද ක්‍රීඩා කරනු ඇති.
ශ්‍රී ලංකාව (විය හැකි): 1 පැතුම් නිශ්ශංක, 2 දිමුත් කරුණාරත්න, 3 කුසල් මෙන්ඩිස් (කඩුලු රකින්නා), 4 සධීර සමරවික්‍රම, 5 චරිත් අසලංක, 6 ධනංජය ද සිල්වා, 7 දසුන් ශානක (නායක), 8 දුනිත් වෙල්ලාලගේ, 9 මහීෂ් තීක්ෂ්ණ කසුන් රාජිත, 11 මතීෂ පතිරණ
කෙසේ වෙතත් කනස්සල්ලට කරුණ නම් වර්ෂාපතනයේ සම්භාවිතාව සියයට 68කට වඩා ඉහළ බවට පළ කෙරී ඇති අනාවැකියයි. නමුත් මේ වන විට ආර් ප්‍රේමදාස ක්‍රීඩාංගනය හා අවට ප්‍රදේශයට හොඳින් හිරු එළිය වැටී තිබෙනවා.
