මහ බැංකු අධිපති ආචාර්ය නන්දලාල් වීරසිංහ මහතාට ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල විසින් ඊයේ (24) දිනයේ ස්තුතිය පළකර තිබෙනවා.
ඒ පාර්ලිමේන්තුවට ඉදිරිපත් කර ඇති මහ බැංකු සංශෝධන පනත් කෙටුම්පතට සම්බන්ධයෙන් ගොනු කර තිබූ පෙත්සම් විභාගයට පෙනී සිටීම හේතුවෙන්.
අදාළ පනත් කෙටුම්පතට එරෙහිව ගොනු කර තිබූ පෙත්සම් විභාගය කර ශ්‍රේෂ්ඨාධිකරණ විනිසුරු මඩුල්ල එහි රහසිගත තීන්දුව කථානායකවරයා වෙත යොමු කරණ බවයි අධිකරණයේ දී ප්‍රකාශ කර ඇත්තේ.
මේ අතර පෙත්සම්වලට අදාළ විභාගය අවසන් කළ අධිකරණය ලිඛිත දේශන තිබේ නම් ඒවා ලබන 27 වන දා වන විට ගොනුකරන ලෙස ද පාර්ශවකරුවන්ට දැනුම්දී තිබෙනවා.
මේ අතර ශ්‍රී ලංකාව මුහුණ දුන් දරුණු ආර්ථික අර්බුදය හමුවේ මෙරට බැංකු පද්ධතිය ස්ථාවර පවත්වා ගැනීමට හැකියාව ලැබුණු බව මහ බැංකු අධිපති ආචාර්ය නන්දලාල් වීරසිංහ මහතා පවසනවා.
ඔහු මේ බව කියා සිටියේ කොළඹ පැවැති උත්සවයකට එක්වෙමින්.
ඒ අනුව ඉදිරියේ දී බැංකු පද්ධතියේ ස්ථාවර තත්ත්වයක් පවත්වාගෙන යා හැකි බවයි අධිපතිවරයා පෙන්වා දෙන්නේ.
වැඩිදුරටත් අදහස් දක්වමින් ඒ මහතා ප්‍රකාශ කළේ ලොව පුරා බැංකු පද්ධති මුහුණ දෙන අභියෝග සම්බන්ධව පුවත් අසන්නට ඇති නමුත් මෙරට වාණිජ බැංකු ඕනෑම අභියෝගයකට මුහුණ දිය හැකි ආකාරයෙන් සුදානම් බවයි.
