දෙදින නිල සංචාරයක් සඳහා දිවයිනට පැමිණි චීන විදේශ අමාත්‍ය වැන්ග් යී මහතා පිළිගැනීමට ක්‍රීඩා අමාත්‍යවරයා වන අග්‍රාමාත්‍ය මහින්ද රාජපක්ෂ මහතාගේ වැඩිමල් පුත් නාමල් රාජපක්ෂ මහතා ඊයේ (09) කටුනායක බණ්ඩාරනායක ජාත්‍යන්තර ගුවන් තොටුපළට පැමිණියා.
මෙම සිදුවීම පිළිබදව සිය නිල ෆේස්බුක් පිටුවේ ඡායාරූපද සමඟින් සටහනක් තබමින් අමාත්‍යවරයා චීන විදේශ අමාත්‍යවරයා පිළිගැනීමට ලැබීම ගෞරවයක් ලෙස සළකන බවද සටහන් කර තිබුණා.
කෙසේ වෙතත් අදාළ සටහන ප්‍රථමයෙන් සිංහල භාෂාවෙන්ද දෙවනුව එහි චීන පරිවර්තනයද, අනතුරුව ඉංග්‍රීසි පරිවර්තනයද, අවසාන වශයෙන් දෙමළ භාෂා පරිවර්තනයද ප්‍රකාශයට පත්කර තිබෙනවා.
මෙරට භාෂා ප්‍රතිපත්තිය රැකීමට රජයේ අමාත්‍යවරයෙකුට විශේෂ වගකීමක් පැවරෙනවා.
ශ්‍රී ලංකාවේ ආණ්ඩුක්‍රම ව්‍යවස්ථාව ප්‍රකාර සිංහල රාජ්‍ය භාෂාව වන අතර, දෙමළ භාෂාව ද රාජ්‍ය භාෂාවකි.
ඉංග්‍රීසි සන්ධාන භාෂාවක් ලෙස යොදා ගැනෙන අතර අනෙක් භාෂා යොදා ගැනෙන්නේ ඉන් අනතුරුවයි.
