ලුතිනන් කර්නල් ප්රසාද් හෙට්ටිආරච්චි මහතාට එරෙහිව පනවා ඇති ඇප කොන්දේසි ලිහිල් කරන ලෙස ඔහු වෙනුවෙන් පෙනී සිටි නීතිඥවරිය කළ ඉල්ලීම කොළඹ ත්රිපුද්ගල මහාධිකරණය අද (27) ප්රතික්ෂේප කර තිබෙනවා.
අදාළ නඩුව අමල් රණරාජා, නවරත්න මාරසිංහ සහ මංජුල තිලකරත්න යන මහාධිකරණ විනිසුරුවරුන් හමුවේ කැඳවූ අවස්ථාවේ ප්රසාද් හෙට්ටිආරච්චි මහතා වෙනුවෙන් පෙනී සිටි නීතිඥවරිය ඉල්ලීමක් කරමින් ප්රකාශ කර ඇත්තේ සෑම මසකම පළමු සහ තෙවන ඉරිදා දිනවල අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසට පනවා ඇති ඇප කොන්දේසිය ලිහිල් කරන ලෙසයි.
තරුණයින් ඇතුළු 11 දෙනෙකු පැහැරගෙන ගොස් ඝාතනය කිරීම සම්බන්ධයෙන් වන අධිචෝදනා යටතේ නීතිපතිවරයා විසින් පවරා ඇති නඩුවේ 10 විත්තිකරු ලෙස නම්කර ඇති ලුතිනන් කර්නල් ප්රසාද් හෙට්ටිආරච්චි මහතා විත්තිකරුවන් 14 දෙනෙකුට එරෙහිව නීතිපතිවරයා විසින් මෙම නඩුව පවරා තිබුණා.
අගතියට පත් පාර්ශ්වය වෙනුවෙන් පෙනී සිටි නීතිඥ අචලා සෙනෙවිරත්න මෙනවිය එම ඉල්ලීමට විරුද්ධත්වය පළ කරමින් එම විත්තිකරු වසර දෙකකට ආසන්න කාලයක් අධිකරණය මගහැර රටින් පලාගොස් සිටියදී අත්අඩංගුවට ගෙන අධිකරණයට ඉදිරිපත් කළ අයෙකු වන බවත් එකී ඇප කොන්දේසි ලිහිල් කිරීමක් සිදුකළහොත් යළිත් රටින් පලායාමේ හැකියාවක් ඇති බව පෙන්වාදී තිබෙනවා.