අදට යෙදී ඇති 74 වන ජාතික නිදහස් දිනය ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් කොළඹ නිදහස් චතුරඝ්‍රයේදී පැවැත්වෙනවා.
මෙවර උළෙලේ තේමාව වන්නේ ‘අභියෝග ජයගත් ඉසුරුමත් හෙට දිනක් – සෞභාග්‍යමත් මව්බිමක්’ යන්නයි.
උත්සවයේ ත්‍රිවිධ හමුදා පෙළපාලි සඳහා 6,500ක භට පිරිසක් සහ සන්නද්ධ රථ 111ක් සහභාගී කරගැනුනා.
එමෙන්ම ගුවන් හමුදා සංදර්ශනයක්ද පැවැත්වෙන අතර ඊට ගුවන් යානා 26ක් යොදාගන්නා බව ගුවන් හමුදාපති එයාර් මාර්ෂල් සුදර්ශන පතිරණ මහතා පවසනවා.
නාවික හමුදාව විසින් ගාලු මුවදොර පිටියේදී දේශය වෙනුවෙන් ආචර වෙඩි මුර 25ක් පිරිනැමීම දහවල් 12ට සිදුකරන බව නාවික හමුදාපති වයිස් අද්මිරාල් නිශාන්ත උළුගේතැන්න මහතා සඳහන් කරනවා.
උත්සවයේ ආරක්ෂක කටයුතු සඳහා පොලීසිය සහ ත්‍රිවිධ හමුදාවේ 3,000ක් පමණ පිරිසක් යොදවා ඇති අතර සංස්කෘතික අංග සදහාද විශාල පිරිසක් සහභාගී වනවා.
මෙවර නිදහස් දිනය සඳහා රථවාහන ඉන්ධන ඇතුළු සියලුම වියදම් සඳහා ආසන්න වශයෙන් රුපියල් මිලියන 130 ක් වැයකෙරෙන බවයි වාර්තා වන්නේ.
