ත්රස්ත විරෝධි පනත් කෙටුම්පත පාර්ලිමේන්තුවට ඉදිරිපත් කිරීම තවදුරටත් කල් දමන බව අධිකරණ අමාත්ය ආචාර්ය විජයදාස රාජපක්ෂ මහතා පවසනවා.
විවිධ පාර්ශවවල ඉල්ලීම් සලකා බලමින් මෙම තීරණය ගත් බව අධිකරණ අමාත්යවරයා අද (28) පාර්ලිමේන්තුවේ දී ප්රකාශ කළා.
කිසිදු ආකාරයකින් ජනතාවට පීඩාවක් වන ආකාරයේ පනතක් මේ පාර්ලිමේන්තුවට ඉදිරිපත් නොකරන බවත් මෙම පනත ජනතාව මර්දනය කිරීම සඳහා ඉදිරිපත් කරන්නක් බවට විශාල වශයෙන් ජන මතයක් ගොඩනැගිමෙන් පවතින බව ද අමාත්යවරයා පෙන්වා දුන්නා.
”මෙම පනත් කෙටුම්පත පිළිබඳ ඕනෑම යෝජනාවක් ලිඛිතව ඉදිරිපත් කිරීමටත්, ඕනෑම පාර්ශ්වයකට පැමිණ අපි මුණගැහිලා මේ පිළිබඳව සාකච්ඡා කිරීමටත් ඉඩකඩ විවෘත වෙලා තියෙනවා. මේක හදිසි කරලා ඉදිරිපත් කරන්නේ නෑ . ඕන තරම් කාලයක් දෙන්නම්. ඕනෑම පාර්ශ්වයකට ඇවිල්ලා අපිත් එක්ක සාකච්ඡා කරන්නත් එවැනි පුළුල් සාකච්ඡා වට කිහිපයකින් පස්සේ සියලු දෙනාග අදහස් විමසලා අවශ්ය සංශෝධන කිරීමෙන් පසුවයි මේ මේ පනත පාර්ලිමේන්තුවට ඉදිරිපත් කරන්නෙ”