ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ භාණ්ඩාගාරික වෙඩි තබා ඝාතනය කිරීම ඇතුළු තවත් මිනීමැරුම් ගණනාවක් සඳහා අවශ්‍යව සිටි සැකකරුවෙකු ඊයේ (06) රාත්‍රී කාලයේ කටුනායක ගුවන් තොටුපළේදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබෙනවා.
මෙම සැකකරු වෙනත් නමකින් කූඨ ලෙස සකස් කර ගත් ව්‍යාජ ගමන් බලපත්‍රයක් උපයෝගී කරගනිමින් ඩුබායි රාජ්‍යයට පළා යාමට ගුවන්තොටුපළ වෙත පැමිණ තිබු බව පොලිසිය පවසනවා.
එහිදී, ස්වයංක්‍රිය මුහුණු හඳුනාගැනීමේ පද්ධතිය මගින් මෙම සැකකරු හඳුනාගෙන පසුව අපරාධ පරීක්ෂණ දෙපාර්තමේන්තු නිලධාරීන් විසින් අත්ඩංගුවට ගෙන තිබෙනවා.
අත්අඩංගුවට ගත් සැකකරු අවුරුදු 30ක් වන ඇල්පිටිය, කරන්දෙණිය ප්‍රදේශයේ පදිංචිකරුවෙක්.
ඔහු මෙරටින් පළා යාම සඳහා මදුරදූවගේ දිල්ෂාන් මධුසංඛ ද සිල්වා යන ව්‍යාජ නමකින් කූඨ ලෙස සකස් කළ ගමන් බලපත්‍රයක් සකස් කර ගෙන ඇතැයි අනාවරණය වී තිබෙනවා.
සැකකරු ශ්‍රී ලංකා යුද්ධ හමුදාවේ කමාන්ඩෝ රෙජිමේන්තුවේ සේවය කර පසුව සේවය හැර ගිය පුද්ගලයෙක්.
ඔහු මහජන සෞඛ්‍ය පරීක්ෂකවරුන්ගේ සංගමයේ භාණ්ඩාගාරිකවරයා වෙඩි තබා මරා දැමීම සඳහා ඔත්තු බැලූ බවට පොලිසිය විසින් කරුණු අනාවරණය කරගනු ලැබ තිබෙනවා.
සැකකරු ඊයේ රාත්‍රී 07:15 ට එමිරේට්ස් ගුවන් සේවයේ ඊ.කේ. – 653 දරන ගුවන් යානයෙන් ඩුබායි බලා පළා යාම සදහා කටුනායක ගුවන් තොටුපොළ වෙත පැමිණ සිටියදී අත්අඩංගුවට ගෙන තිබුණා.
විශේෂ කාර්ය බළකායේ නිලධාරීන්ගෙන් සමන්විත විශේෂ පොලිස් කණ්ඩායමක් අද (07) අලුයම 5:55ට කටුනායක ගුවන් තොටුපොළ වෙත පැමිණ මොහු වැඩිදුර විමර්ශන කටයුතු සදහා කොළඹ අපරාධ පරීක්ෂණ දෙපාර්තමේන්තු මුලස්ථානය වෙත රැගෙන ගොස් තිබෙනවා.
