වත්මන් පාර්ලිමේන්තුවේ වාර අවසාන කර තිබෙනවා.
ඒ, ඊයේ මධ්‍යම රාත්‍රියේ සිටයි. ඊට අදාල ගැසට් නිවේදනය ජනාධිපති රනිල් වික්‍රමසිංහ මහතාගේ නියමය පරිදි ජනාධිපති ලේකම් සමන් ඒකනායක ඊයේ නිකුත් කර තිබෙනවා.
එලෙස පාර්ලිමේන්තුවේ වාර අවසාන කර ඇත්තේ ආණ්ඩුක්‍රම ව්‍යාවස්ථාවේ 70වන ව්‍යාවස්ථාවෙන් ජනාධිපතිවරයා වෙත පැවරී ඇති බලතල ප්‍රකාරවයි. ඒ අනුව පාර්ලිමේන්තුවේ නව සභාවාරය ආරම්භ වන්නේ අගෝස්තු මස 03වන දින පෙරවරු 10යි 30ටයි.
ඊයේ අවසන් වූයේ 09 වන පාර්ලිමේන්තුවේ දෙවන සැසිවාරයයි. එය 2022 වසරේ ජනවාරි 18 සිට ආරම්භ වුණා. එහි පළවෙනි සැසිවාරය ක්‍රියාත්මක වූයේ 2020 වසරේ අගෝස්තු 20 වනදා සිට 2021 දෙසැම්බර් 12 වනදා දක්වායි. පසුව 2022 වසරේ ජනවාරි 18 සිට ආරම්භවූ 09 වන පාර්ලිමේන්තුවේ දෙවන සැසිවාරය ඊයෙන් අවසන් වුණා. ඒ අනුව 2022 අගොස්තු 03 වැනිදා ආරම්භ වන්නේ 09 වන පාර්ලිමේන්තුවේ තුන්වන සැසිවාරයයි.
පවතින පාර්ලිමේන්තුවක වාර අවසන් කිරීමේදී ඒ වන විට ක්‍රියාත්මක වෙමින් තිබූ පාර්ලිමේන්තු කමිටුවල ක්‍රියාකාරිත්වය ද අවසන් වනවා. කෝප් සහ කෝපා කමිටු ද ඒ අතරට අයත්. ඒ අනුව පාර්ලිමේන්තුව යලි ආරම්භ කිරීමෙන් පසු එම කමිටුවලට නව සාමාජිකයින් පත් කර එහි කටයුතු අලුතින් ආරම්භ කිරීමට නියමිත වනවා.
