රටට අවශ්‍ය ප්‍රඥාසම්පන්න දේශපාලන නායකත්වය බිහිකර ගැනීමට තමන්ට නොහැකි වුණු බවත් එහි වගකීම තමන් භාරගත යුතු බවත් පාර්ලිමේන්තු මන්ත්‍රී අතුරලියේ රතන හිමි පවසනවා.
ඒ, විමල් වීරවංශ මහතාගේ නායකත්වයෙන් යුත් උ.ල. සන්ධානය බිහිකිරීමේ අවස්ථාවට ඊයේ (04) එක්වෙමින්.
“අපේ ප්‍රශ්නය දැන් කියන්නෙ ඩොලර් අර්බුදයක් කියලා. මේක ඩොලර් අර්බුදයක් නෙවෙයි. මේක තනි පවුලක්, තනි පුද්ගලයො හත් අට දෙනෙක් බොල් පිළිමවලට අපි වැඳ වැඳ ඒ වන්දනා කරපු යුගය අපි විසින්ම අද අවසන් කළ යුතුව තිබෙනවා. මේ තරම් දැන උගත් මිනිස්සු ඉන්න රටක, මේ තරම් ශීලාචාර මිනිස්සු ඉන්න රටක, අපට අවශ්‍ය ප්‍රඥාසම්පන්න දේශපාලන නායකත්වය අපට බිහිකරගන්න බැරිවුණා. ඒකට අපි වගකියන්න ඕනෙ. අන්න ඒ වගකීම වෙනුවෙන් තමයි, ඒ වරද හදන්න තමයි අපි අද මේ සභාගය බිහිකළේ”
රට බරපතල අර්බුදයකට තල්ලු කරමින් පසුගිය ගෝඨාභය රාජපක්ෂ රජය විසින් ක්‍රියාත්මක කළ රසායනික පොහොර තහනමට රතන හිමියන් ද මූලික විය.
