ජාතික පොලිස් කොමිසමේ නිර්දේශ පරිදි පොලිස් නිලධාරීන් 19 දෙනෙකුට උසස්වීම්, නව තනතුරුවලට පත් කිරීම් සහ ස්ථාන මාරුවීම් සිදුකර තිබෙනවා.
මෙලෙස උසස්වීම්, නව තනතුරු සහ ස්ථාන මාරුවීම් ලද පිරිස අතර කාන්තා ජ්‍යෙෂ්ඨ පොලිස් අධිකාරිවරියන් දෙදෙනෙකු ද වනවා.
ඒ අනුව ජ්‍යෙෂ්ඨ නියෝජ්‍ය පොලිස්පති යු.පී.ඒ.ඩී.කේ.පී. කරුණානායක රත්නපුර දිසාවේ සිට ඌව පළාත භාර ජ්‍යෙෂ්ඨ නියෝජ්‍ය පොලිස්පති ලෙස පත් කර ඇති බවයි පොලිස් මාධ්‍ය කොට්ඨාසය සඳහන් කළා.
නියෝජ්‍ය පොලිස්පති ඩී.පී. චන්ද්‍රසිරි ක්‍ෂේත්‍ර බලකා මූලස්ථාන දිසාව භාර නියෝජ්‍ය පොලිස්පති තනතුරේ සිට ගාල්ල දිසාව භාර නියෝජ්‍ය පොලිස්පති ලෙසත්, නියෝජ්‍ය පොලිස්පති ජී.අයි.ඩී.ආර්. විජේසිංහ ගාල්ල දිසාව භාර නියෝජ්‍ය පොලිස්පති තනතුරේ සිට ක්‍ෂේත්‍ර බලකා මූලස්ථානය වෙතත් මාරුකර තිබෙනවා.
නියෝජ්‍ය පොලිස්පති ඩී.වී.පී. අජිත් හේසිරි බඳවාගැනීම් හා පුහුණු දිසාව භාර නියෝජ්‍ය පොලිස්පති තනතුරේ සිට විශේෂ ආරක්ෂාව භාර නියෝජ්‍ය පොලිස්පති ලෙසත්, නියෝජ්‍ය පොලිස්පති ඒ.එස්.පී.සී. වෙදමුල්ල නාවික හා සංචාරක දිසාව භාර නියෝජ්‍ය පොලිස්පති තනතුරේ සිට කුරුණෑගල දිසාව භාර නියෝජ්‍ය පොලිස්පති ලෙස ස්ථාන මාරු කර තිබුණා.
වැඩබලන නියෝජ්‍ය පොලිස්පති එච්.සමුද්‍රජීව, බස්නාහිර පළාත් ප්‍රජා පොලිස් පරිසර ආරක්ෂණ සහ මහජන සාමය කළමනාකරණ දිසාව භාර නියෝජ්‍ය පොලිස්පති තනතුරේ සිට නාවික හා සංචාරක දිසාව භාර නියෝජ්‍ය පොලිස්පති ලෙස පත්කර තිබෙනවා.
අගමැති ආරක්ෂක කොට්ඨාසයේ කටයුතු කළ වැඩබලන නියෝජ්‍ය පොලිස්පති ඩබ්ලිව්.එස්.පී. ද සිල්වා අගමැති ආරක්ෂක දිසාව භාර නියෝජ්‍ය පොලිස්පති ලෙසත්, කාන්තා ජ්‍යෙෂ්ඨ පොලිස් අධිකාරී ආර්.ඒ.ඩී. කුමාරි පොලිස් මූලස්ථානයේ සිට පරිගණක අපරාධ විමර්ශන කොට්ඨාසයේ අධ්‍යක්ෂ ලෙස පත් කළ බව පොලිස් මාධ්‍ය කොට්ඨාසය සඳහන් කළා.
එමෙන්ම කාන්තා ජ්‍යෙෂ්ඨ පොලිස් අධිකාරිනි පී.ජී.ජේ.එම්. ආරියසේන විභාග කොට්ඨාසයේ සිට පොලිස්පති ලේකම් කොට්ඨාසයේ අධ්‍යක්ෂ ලෙස පත් කර තිබෙනවා.
ඊට අමතරව වැඩබලන නියෝජ්‍ය පොලිස්පතිවරයෙක්, ජ්‍යෙෂ්ඨ පොලිස් අධිකාරීවරුන් හත්දෙනෙකු, පොලිස් අධිකාරිවරයෙකු සහ සහකාර පොලිස් අධිකාරිවරයෙකුට උසස්වීම්, නව තනතුරුවලට පත් කිරීම් සහ ස්ථාන මාරුවීම් ලබාදී ඇති බවයි පොලිස් මාධ්‍ය කොට්ඨාසය සඳහන් කරනවා.
